Un krus aki na altura di un brùg di e bario di Pozo de Gamboa, munisipio di Panuco kaminda a haña sinku hòmber morto
POZO DE GAMBOA, MÉHIKO, AFP.- Un komunidat na Méhiko a lanta un dia den yüli ku sinku kurpa kologá na un brùg. E imágen kruel tabata un rekordatorio ku nunka violensia a bai kompletamente for di e region akí, ku ta di importansia stratégiko pa kartelnan di droga.
A haña kurpanan na Pozo de Gamboa, un komunidat di apénas 5.000 habitante den estado di Zacatecas. Zacatecas ta konektá parti sentral di Méhiko ku nort i wèst di e pais i tin rutanan krusial pa transporte ilegal di droga.
AFP a bishitá e pueblo, konosí pa produkshon di bonchi, pero ku awor ta práktikamente paralisá pa miedu. Ora solo baha, hende ta sera nan mes den kas i ta evitá di papia tokante e masakre. Zacatecas, ku tin 1,6 mion habitante, tabata parse di a laga su añanan mas sangriento atras.
Den e periodo ei, masakrenan kometé pa krímen organisá i desplasamentu fòrsá di abitantenan tabata práktikamente kos di tur dia. Un indikadó importante ta e kantidat di homisidio intenshonal.
Na 2022 tabatin alrededor di 1.300 homisidio, miéntras na 2025 e sifra a baha te na 144, segun sifranan ofisial. Gobièrnu ta atribuí e redukshon na mihó koordinashon den área di seguridat ku outoridatnan federal. Pero dia 18 di yüli, ora e sinku kurpanan kologá a aparesé, e sensashon di pas a disparsé. Entre e víktimanan tabatin un èks alkalde, funshonarionan públiko i empresarionan ku tabata bini for di otro partinan di e estado.
E mesun dia, outoridatnan a haña sinku otro kurpa den áreanan den serkania.
