RICHMOND, VIRGINIA, MERKA, AP.- Míles di aktivista na fabor di arma di kandela a subi kayanan den área di Capitol na Virginia djaluna, pa protestá kontra plan di legislashon di estado pa aprobá un lei di kontròl di arma.
E gobernador Ralph Northam a deklará un estado di emergensia temporal un dia promé ku e evento, prohibiendo tur arma, inkluyendo pistolnan, durante di e evento riba Plaza di Capitol. E partisipashon di gruponan radikal i supremasistanan blanku a subi alerta pa un akto violento manera a sosodé na Carlottesville na aña 2017.
Mayoria di e manifestantenan di Richmond tabata hòmbernan koló kla, i nan a sali den gran kantidat djaluna apesar ku tabata sumamente friu.
“Gobièrnu no ta dirigí nos, nos ta dirigí gobièrnu”, asina Kem Regik, un agente di seguridat privá a bisa.
Tabatin un presensia fuerte di polis na e sitio, ku agentenan riba dak i otronan patruyando den outo i riba baiskel.
Outoridat a purba evitá un esena violento manera a pasa na Charlottesville durante un di e protestanan mas grandi di e último dékada.
