BEIJING, AP.- Mas di 1.700 trahadó di salú chines a wòrdu infektá ku e vírus nobo ku a mata kasi 1.400 persona i a ekstendé pa otro paisnan den Asia, Europa i Merka, segun informashon di un funshonario chines djabièrnè.
Seis di e trahadónan a muri, segun indikashon di e vise direktor di Komishon Nashonal di Salú, Zeng Yixin, den un konferensia di prensa. “E asuntu aki ta un preokupashon grave” pa e komishon, ku a emití normanan pa e prevenshon i kontròl di malesa den diferente institushon médiko, asina el a agregá.
E trahadónan di salú ta forma 3,8% di e kasonan segun Zeng, sitando sifranan di dos dia pasa.
E komishon a informá di un oumento importante den e kantidat di infekshon komo resultado di un método nobo di konteo adoptá den provinsia di Hubei, esun mas afektá. Hubei a kuminsá inkluí tur kaso basá riba diagnóstiko di e dòkter promé ku konfirmá un análisis den laboratorio.
E kasonan konfirmá na China kontinental a subi na 63.851 djaweps anochi, ku 5.090 kaso mas ku un dia promé. E kantidat di morto a subi ku 121 kaso adishonal.
E aselerashon den kantidat di kasonan no nesesariamente ta reflehá un oumento agresivo di infekshon pero mas bien un método nobo.
Ekspertonan a bisa tambe ku esaki ta reflehá un aglomerashon kaótiko den e kantidat di personanan ku ta buska tratamentu i di e difikultatnan pa enfrentá e akumulashon d muestranan no eksaminá den provinsia di Hubei i den su kapital Wuhan.
