QUITO, AP.- Korte Nashonal di Hustisia a kondena visepresidente Jorge Glas na seis aña di prizòn, despues di a deklar’é kulpabel pa korupshon relashoná ku e kaso Odebrecht.

Hues Edgar Flores a hasi e sentensia públiko, kaminda el a señalá ku Glas a faboresé kontraktnan públiko  a kambio di e pago di retribushonnan di Odebrecht, un kompania ku tambe a wòrdu señalá di komplisidat den aktonan korupto den otro paisnan di e region.

Nuebe persona a wòrdu akusá den e kaso, pero a ordená sanshon di prizòn di seis aña pa sinku, inkluyendo Glas. Sobrá a haña solamente 14 luna di prizòn, despues di konsiderá ku nan a kolaborá ku hustisia i un a wòrdu lagá den libertat.

Glas i sobrá akusadonan mester paga 33,5 mion dòler, un montante ku Odebrecht a rekonosé di a entregá na funshonarionan ekuatoriano públiko a kambio di obranan di infrastruktura.

Apesar di e proseso legal, Glas a bisa ku e lo no renunsiá su kargo i ta keda komo  visepresidente debí ku Ecuador su lei ta stipulá ku e kargo ta bira vakante solamente mediante renunsia, despues di tres luna di bandoná òf pa desishon di tres kuart parti di miembro di Asamblea despues di un huisio polítiko, kual no a sosodé.

LAGA UN KOMENTARIO

Please enter your comment!
Please enter your name here