BOGOTA, COLOMBIA, AP.- E visepresidente di Vietnam, Dang Thi Nogc Thinh, lo realisá un bishita ofisial di tres dia na Colombia. Akinan e ta reuní ku presidente Juan Manuel Santos i dirigentenan haltu di e pais, segun informashon di outoridatnan.
Esaki lo ta e promé bishita ofisial di un dirigente di Vietnam haltu desde ku a establesé relashonnan diplomátiko bilateral den 1979, segun indikashon di kansier kolombiano den un komunikado.
Den e gira, kual ta kuminsá djárason anochi, Dang Thi Nogc Thing lo reuní ku e visepresidente, German Vergas Lleras, i ku Alfredo Ramos, enkargá di negoshi di Colombia na Vietnam.
Den e enkuentro ku Santos djaweps mainta, ámbos pais ta firma un memorando di entendimentu di koperashon agríkola i peska, spesialmente den un programa di entrenamentu di interkambio di informashon i eksperensia den mishonnan tékniko i di negoshi. Ademas lo traha den fortalesimentu mutuo riba temanan manera edukashon, komersio i turismo i deporte entre otro.
E gobièrnu di Vietnam a manifestá su apoyo den e proseso di pas ku ta tumando lugá ya pa dos aña kaba na La Habana entre e gobièrnu di Santos i miembronan di gueria di FARC. Asina e kansier a agregá.
E gobièrnu vietnamita tin interes pa yuda Colombia relashoná ku post-konflikto riba temanan manera kitamentu di mina i retasonan eksplosivo di guera.
