Ra’Kei Curaçao den kolaborashon ku Alltocar:
WILLEMSTAD. – Na e apertura ofisial di dia 23 di yüli, Ra’Kei Curaçao a presentá un vishon moderno riba lèsnan di kore outo na Kòrsou.
Den un kolaborashon eksklusivo ku Alltocar, diler ofisial di Dongfeng Nammi na Kòrsou, Ra’Kei Curaçao a introdusí e promé vehíkulo eléktriko pa lès di stür na Kòrsou. E inisiativa aki ta kombiná inovashon, sostenibilidat i preparashon pa e futuro di mobilidat. Ku esaki, e “rijschool” ta brinda futuro shofùrnan e oportunidat pa sera konosí ku e teknologia ku ta kambiando e manera ku mundu ta move.
Ademas di siña manehá un outo, alumnonan lo eksperensiá e diferensianan entre un outo tradishonal i un vehíkulo eléktriko, manera reakshon di e outo i e uso efisiente di energia.
“Nos no ta djis siña hende stür,” Dionyra, fundadó di Ra’Kei Curaçao ta bisa. “Pa Ra’Kei Curaçao, edukashon di tráfiko ta bai mas leu ku simplemente siña reglanan di tráfiko. Ta trata di forma shofùrnan ku konosementu, konsientisashon i e abilidat pa adaptá na kambionan mundialmente” Segun Alltocar, sektor di outo eléktriko ta sigui krese rápido. Pa e motibu ei, ta importante pa futuro shofùrnan eksperensiá vehíkulonan eléktriko for di nan promé lèsnan di stür.
Ra’Kei Curaçao no ta djis sigui futuro di formashon di shofùr, pero ta yuda forma e futuro aki. Ku lèsnan di stür den un vehíkulo eléktriko, ta prepará futuro shofùrnan pa un mundu ku ta kambiando konstantemente.
E kolaborashon entre Ra’Kei Curaçao i Alltocar ta mustra kon sektor privá por traha huntu pa stimulá inovashon, sostenibilidat i edukashon di kalidat.
Ku e vishon aki, Ra’Kei Curaçao ta konfirmá su kompromiso pa ofresé un eksperensia di stür moderno, seif i inovativo.
