HANOVER, Alemania (AFP).- Volkswagen e fabrikante di outo mas grandi di Europa, a anunsiá di tin planiá pa kòrta mas di 35.000 kupo di trabou den Alemania pa 2030, loke ta ekivalente na un tersera parti di su personal, pa baha su kostonan i evitá ku e fábrika mester sera.
Danki na un akuerdo ku sindikatonan, Vokswagen ta spera di spar un total di 4.000 mion euro pa por keda riba pia, segun nan ta bisa den un komunikado.
E representantenan di personal a asentuá ku e retironan no ta fòrsá, sino ku ta esnan ku ta baha ku penshun i lo no tuma otro trahadó na nan lugá.
“Nos a logra yega na un solushon pa e empleadonan, un solushon ku ta salbaguardiá e puestonan di trabou, preservá e produkshon i na mes momentu permití invershonnan importante den futuro”, segun Thorsten Groger, negoshadó dje sindikato.
E negoshadó a asentuá ku e medidanan pa baha gastu ta respetá “e liñanan kòrá” dje sindikato. “Lo no tin seramentu di planta miéntras ku retironan tampoko lo tuma lugá”, segun el a bisa.
Segun e sindikato, e gerensia na un promé instante ker a eliminá 55.000 puesto di trabou. Pero empleadonan a aseptá pa renunsiá un seri di prima i redusí e kapasidat di produkshon den vários dje dies plantanan aleman dje grupo.
Segun e miembro di gerensia di Volkswagen Oliver Blume, e kostonan dje empresa ta muchu haltu i e márgennan di benefisio di VW, ku ta representá mas di mitar dje bentanan, demasiado abou.
Volkswagen tambe a sufri e bahada mundial di benta di outo, komo konsekuensia dje kompetensia di China.
