WASHINGTON, USA (AFP).- Presidente di Merka, Joe Biden, ayera a kumpli 81 aña ku e tradishonal pordon na kalakunanan den kuadro di Thanksgiving na White House, esei na momento ku su edat ta tema di preokupashon entre votadónan norteamerikano ku bista riba elekshon di 2024.

E demokrat ta e presidente  di mas edat den historia di Merka, i si e gana un di dos mandato presidensial otro aña, lo e tin 86 aña ora ku su periodo kaba.

Biden tin biaha ta hasi chansa riba esei i su ekipo ta bisa ku e mandatario tin un agènda intenso i pèrtá ku lo kansa hopi hende, inkluso hopi di esnan mas hóben kuné. Di tur manera, enkuesta tras di enkuesta ta mustra  ku edat dje presidente ta e preokupashon di mas grandi serka votadónan di Merka. Esaki ta keda reforsá pa e diferente biahanan ku e presidente a trompeká òf te hasta duna kontestanan straño durante di konferensianan di prensa.

Ounke ku e èks-presidente Donald Trump -ku kua probablemente Biden lo enfrentá otro aña na urna- tambe tabatin un seri di fayo, ainda e no ta kousa preokupashon entre e votadornan apesar di su 77 añanan.

Biden “no ta hasiendo hopi kos robes”, pero e ta luchando pa kambia e persepshonnan tokante su edat, manera e.o. asuntunan di ekonomia, segun David Karol, profesor di gobièrnu i polítika na Universidat di Maryland.
Si e keda reeligí otro aña, Biden lo laga e funshon ku nuebe aña mas ku Ronald Reagan, ku tin e rèkòrt, ora ku el a laga presidensia na edat di 77 aña.

White House parse di no ta preokupá ku e enkuestanan, ya ku e demokratnan a kosechá un seri di éksito elektoral. Pero e sifranan ta desalentador pa e partido.

No ménos ku 74% di esnan enkuestá ta di opinion ku Biden lo ta muchu bieu pa un di dos mandato, kontra di 50% di Trump, segun un sondeo resien di ABC/Washington Post.

Un enkuestadó di Yahoo/YouGov a revelá ku 54% di norteamerikanonan ta bisa ku Biden no tin “e forsa pa kumpli ku e trabou komo presidente”, kontra di 41% promé ku e elekshonnan di 2020.

Di otr’un banda, tin algun analista ta bisa ku e edat di Biden no mester konta.

“E biramentu bieu ya no ta loke tabata den pasado”, segun Jay Olshansky, investigadó di bida di Illinois University. “Tin segmentonan hopi amplio di e poblashon ku ta sobrebibí te hasta e di ocho dékada perfektamente kapas di ta presidente, òf di hasi loke ku ta nan deseo”, segun e profesor.

LAGA UN KOMENTARIO

Please enter your comment!
Please enter your name here