DEN HAAG.- tur kos ta indiká ku e paisnan den reino lo por haña otro despues ku a logra un kompromiso pa loke ta trata e areglo di disputa (geschillenregeling) ku ta na diskushon den Tweede Kamer. For di Ulanda a yega e informashon ku despues ku e diferente representantenan a presentá un kantidat di moshon, finalmente tur esnan embolbí a kuminsá mira ku ta mihó buska un kompromiso entre e paisnan.
Sekretario di estado ulandes, enkargá ku relashonnan den Reino Raymond Knops a haña su mes den proposishonnan ku a subi mesa. Awe mardugá ta vota riba e moshonnan presentá den Tweede Kamer. Knops den oranan di atardi a yama danki na tur parlamentario pa nan kontribushon, nan aporte konstruktivo.
Den prinsipio e sekretario di estado ulandes tabatin hopi opheshon kontra imienda presentá pa sierto parlamentario i spesialmente parlamentarionan di e paisnan. Un di e proposishonnan ta pa instituí un órgano na nivel di reino pa atendé ku disputanan den reino. Esaki mester resorta bou di Raad van State. E delegado speshal di Aruba sr. Ady Thijsen a presentá un moshon den e direkshon ei i segun e diferente parlamentarionan e moshon ei por konta ku nan sosten. Sr. Knops ta haña ku mester skucha Raad van State promé pa wak si nan ta dispuesto, den e kuadro ei e mandatario ulandes a proponé pa wanta ku votashon riba e lei di areglo di disputa.
Tabatin un momentu ku e sekretario di estado a proponé Parlamento ulandes pa vota riba e moshonnan pero no riba e lei di reino. Segun Knops sino ta kita e outoridat di Raad van State. Di tur manera ta parse ku e paisnan outónomo den reino ta logra un akuerdo ku Ulanda pa awor aki riba e areglo di disputa.
