Waha di morto wabi di 84 aña

Pronto e klup di outonan wabi lo disponé di otro atkisishon úniko. Ta trata di un waha di morto wabi di aña 1936 di marka Fargo. E outo aki ta den reparashon pa sigur dos aña kaba i si tur kos kana segun planiá, e lo por keda presentá na okashon ku Wabi klup selebrá nan di 55 aña di eksistensia, e aña aki.

Djasabra a bishitá Ranfor Nijdam i Norwin Walle, dos persona ku nan kurason ta bati ku e outonan wabi aki. Ranfor a konta nos ku e ta un ‘barn find’, esta un vehíkulo òf tambe asta avion di hopi aña ku tabata bon wardá. Den e kaso di e waha di morto aki, e tabata bon wardá den un schuur. Tabata un lots di un empresario di funerario, kaminda e tabata traha su kahanan di morto. E waha di morto aki tabata asistí e agensia funerario. E waha di morto no a kore hopi. Probablemente pa kapricho a lag’é para den e lots, bon protehá pa awa i solo, siendo e tabata bon bon. Ta trata di un vehíkulo di aña 1936 esta 84 aña. E waha aki mester tin mas di 70 aña pará pòrnada bon warda. Komo un hende a kumpra e lots i ora a bai habri a topa ku e waha di morto aki den dje.


Suèltu…

Klup di Wabi su suèltu ta ku nan a haña yamada mesora di un waha di morto di aña 1936. Diferente miembro di Wabi Klup a bai kaminda nan tabatin kontakto ku e doño i asina a logra kumpr’é. Sin drenta den detaye di e preis ku a kumpra, pero por bisa si ku e tin un balor sentimental históriko. Na e sitio un miembro di wabi klup mes a kumpr’é mesora i a hasi un donashon di mitar di e gastunan na e klup. Asina e vehíkulo a keda wardá den kònteiner, despues ku un komishon a disidí ku ta bai kuminsá drech’é.

Motor a drei bon…

Ora a kumpra e waha di morto aki promé kos ku nan a hasi ta drei e motor pa mira si e no ta pega. A resultá ku e no ta pega, loke ta indiká un bon notisia. E komishon a bai traha riba un presupuesto i tambe un karpinté. E parti ariba di e waha di morto ta di palu i e adornonan so ta di hardhout. Tur otro palu tabata putri ounke e no a basha den otro. tantu Renfor komo Norwin ta traha, konsekuentemente ta wikènt so nan por a traha riba e vehíkulo aki. Nan a logra haña un karpinté ku bai over na remplasá tur e palunan ku tabata putri. E trabou aki a kuminsá na 2018. Mester a lama e parti ariba i bai ku e parti abou di e vehíkulo. E bia aki si nan a usa hardhout kompleto, pa e no putri nunka mas.


Kasi nada di frus…

E parti abou nan a bai kuné i a kita tur frus i fèrf for di dje. A saka tur putrí, ounke no tabatin mashá. A pone e fèrf pretu pa protehá e bòdi. E parti di motor ta den man di Norwin Walle. I el a konta ku e motor lo bai keda original pasobra tin hopi kos ku por drecha. Komo e vehíkulo no a kore hopi e motor no ta gastá. Norwin tin eksperensia ku e motornan aki pasobra nan tin diferente outo ku e tipo di motornan aki. I nan por haña tur piesa ku mester pa drecha e waha di morto aki.

 

Hopi gastu…

Pa drecha un vehíkulo manera esaki ta basta kostoso. Ounke manera Renfor i Norwin a bisa, no por bisa delantá kuantu e lo ta. Semper ta paso a paso nan ta bai i pa na final wak kiko a gasta. I ta mihó pa nan no sa delantá kuantu ta kosta pa drech’é, sino si e sali hopi sèn, nan lo a preferá kumpra un nobo. I p’esei ta segun e trabou ta kana ta saka e sèn tiki tiki. E ta un reto i e reto aki ta algu ku nan di wabi klup ta gusta. For di ora nan a mira e vehíkulo nan a gust’é i no tabata ke pa e keda di slop.

 

Meta final…

Ora e waha di morto ta kla, ainda no sa kiko ta bai pasa. No sa ainda si e lo bira un vehíkulo djis pa shou òf ku lo kore ku morto den dje. Renfor a bisa Djasabra ku nan ta atendé solamente e parti di reparashon. Ta Wabi Club ta doño i ta direktiva ta disidí kiko ta bai hasi ku e waha di morto. E por bira un collection item di klup. Si tabatin kluphuis e lo a para einan den forma di prònk. Pero no ta ekskluí ku e por keda usa atrobe pa agensia funerario.


Sensashon…

Wabi klup tin 150 miembro i sigur mas di 300 vehíkulo total. Tin miembro, tin un dos òf tin te asta un dosein di vehíkulo di wabi. Pa nan komo miembronan di wabi klup i ku tin e vehíkulonan wabi aki ta un dushi sensashon ora nan por saka algu ku tabata manera un chatara i hasié algu bunita. Hopi yu di Kòrsou tin amor pa outo. Renfor a bisa ku dia e tabata yòn e tabata gusta e tipo di outonan aki. I si haña un awor aki, ounke tur frusá e ke trese bèk riba wil. Tempu e tabata yòn e no por a kumpr’é, pero awor si e por. E ta duna un satisfakshon. I ora nan bai riba un trep nan ta mira kon hende ta atmirá nan i pa nan ta un dushi sentimentu pasobra ta di nan e outo ta.

 

Na òktober riba kaya…

Dia 31 di òktober Wabi Club ta hasi 55 aña. Ta un di e klupnan di outo di mas bieu den region. I nan meta ta pa kaba e outo pa òktober, pa e ta kore i pa e por keda di shou pa e fecha ei. E waha di morto ta basta leu i nan por keda kla kuné. Pa fin di yüni e bòdi ta kla i ta sigui ku e motor den man di Norwin.

 

 

SHARE

LEAVE A REPLY