Richeline Koeiman a gradua resientemente pa Bachelor den lei na UDC. Un  dama ku a kuminsá for di ZMLK, siguí pa MLK, VSBO, IFE i awor UDC i e ta un ehèmpel ku ni maske kon abou bo kuminsá, determinashon ta pone bu yega leu.

Tempu difísil…

Nunka mi a pensa ora ma kuminsá ZMLK ku mi lo a yega asina leu, asina el a bisa Djasabra. Awor e ta sintié hopi orguyoso pasobra el a pasa den tempunan difísil. E ta mira ZMLK komo e trapi di mas abou. Einan el a pasa den tempu difísil pasobra ta muchanan otro for di dje. Tin mucha hèndikèp i muchanan ku tin difikultat pa siña. Tabata un ambiente poko straño pa Richeline. Nunka el a imaginá di lo tabata einan i tabata difísil pe. E ta kòrda komentarionan di famia i konosínan ku a hasi e situashon aun mas difísil. El a sinti ku ZMLK no tabata algu pe.

 

Na Hulanda…

Richeline ta splika ku su mama a bai kuné Hulanda ora e tabatin 5 aña. Su mama no a bisé ku nan ta bai biba Hulanda. Dianan tabata pasa i e ta mira ku e no ta bai Kòrsou bèk. Komo mucha e tabata puntra su mama ki dia nan ta bai Kòrsou bèk. E mama a bis’é di a disidí ku e ta keda Hulanda pa trabou i pa studia mas leu. Esaki tabata difísil i un sla duru pa Richeline komo mucha. Asina el a keda bai atras den su mes mundu. Na Hulanda e kultura ta otro, e tabata su so. Su mama ta bai traha 7 or di mainta i ta yega kas 7 or di anochi, mitar di e dia e ta su so. E tabatin un ruman beibi, su mama ta hiba krèsh i Richeline ta su so. E no tabatin niun hende pa papia kuné siendo na Kòrsou e tabatin Oma, primanan etc. Esei a pone ku el a sera su mes. Ora e mester a kuminsá bai skol, nan a bis’é ku e por hasié na Hulanda òf na Kòrsou. E tabata felis di por a bin su skol na Kòrsou. E no tabata sintié na kas na Hulanda, e no tabatin niun hende miéntras su mama kier a kaba su estudio. Asina el a keda Hulanda te ku su 9 aña i a bin Kòrsou.


ZMLK no tabata pa mi…

Na e skol ZMLK mes tabata trata tur mucha igual. Pero e tabatin problema ku komentario di hendenan afó. “Ata e skol ei bo ta bai, bo ta meskos ku e muchanan, i nan ta ‘label’ bo”. Tin hende asta tabata harié pasobra e ta bai un skol pa mucha ku difikultat pa siña. Esaki el a pone su dilanti ku no ta kibr’é pero ta us’é komo gasolin pa e sigui padilanti. Di ZMLK el a pasa pa MLK, Einan tambe tabata otro reto pasobra Richeline a sinti ku el a kai hopi abou. E ta siña lesa di nobo, sòmnan di nobo, kosnan ku el a haña kaba. E sa ku e por pero e tabata den un tera ku no ta fértil. Tabata otro situashon difísil.

 

E mihó den bachelor di Lei…

Di MLK el a bai PBL i den un aña el a bira TKL i einan a keda subi te ku el a yega awor aki na UDC. Pero Richeline tambe a studia 4 aña na IFE komo enfermera. Ora el a kaba IFE el a sinti ku e no ta kla pa bai traha. E ta sinti ku falta mas. Su ruman muhé parti tata a konseh’é pa e siñ’é lei. En prinsipio e no a mir’é pasobra e no ta mir’é komo abogado. Pero lei ta amplio. El a bai inskribí na UDC sin sa nada nada. E promé sinku lunanan tabata duru i a konosé sifranan manera 6 i siñando hopi duru. El a pensa ku kisas e ta robes pero tòg a sigui i den bringa bringa  te awe ku su bachelor den law i komo esun mihó di UDC.

Richeline a sigui bisa ku ainda e no a yega kaminda e ke yega. E ke bai hasi un master den lei di laman. Ta trata di un lei ku ta atendé tur loke ta riba laman manera barkunan ku haña aksidente, lei di seguro, lei ku ta defendé nos flora i fauna i eseinan ta loke e ke spesialisá den dje. El a bisa di a kore stazje na Kustwacht i el a haña e inspirashon ku ta esei e gusta.

 

Kada mucha tin nan potensial…

Tirando un bista den loke el a logra, Richeline ke mustra ku tur mucha ta konta ni maske ku nan ta AGO, VSBO i loke sea nan ta. Kada mucha tin nan potensial. Nos komo edukadó tin di siña kere den nos muchanan. Hopi bes prinsipalmente na Kòrsou ta Havo ta e kos i si bo no bai Havo bo no ta konta. E lo ke laga atras ku tur mayor apoyá e hóbennan den tur kos ku nan ta hasi pasobra e mundu aki no mester di dòkter i no mester di abogado so pero tur tipo di hende. Kere den nos muchanan i stòp di label nos muchanan. Den su kaso e tambe a keda di label. Tin a laga e label traha ku nan i nan a keda kaminda nan ta. P’esei e ke enkurashá otro hóbennan pa sigui bai dilanti, sigui krese, sigui kere den nan mes pasobra e mes te ainda no ta realisá ku e ta aki nan. Nunka el a pensa esaki. Un post ku Richeline a skibi a haña kantidat di share. E ta kòrda ku ora el a kaba slag el a skibi e post i a bai traha mesora. I ora el a yega trabou nan ta bis’é ku e ta famoso ku tantu like i share ku el a haña. Ta algu ku ora el a skibié, el a skibié di felisidat pasobra e sa kon duru el a traha.

 

Mundu no ta fásil…

Richeline a bisa ku hopi bia ta manda muchanan skol di muchanan ku problema pero ta muchanan depresivo i problema mental. Tin bia komo mama bo no sa pasobra e mucha no ta papia. Den su kaso e mes no a bisa su mama nunka pero el a hinka su mes den e mundu ei. Tin mucha ku pa otro motibu ta einan pero si e mira bon i wak bèk, ta muchanan ku problema emoshonal. Komo mucha bo ta kere e mundu ta fásil. Bo por lanta awe hasi loke bo ke i ya pero komo mayor hopi bes ta disidí otro pa e yu.

 

Selebrá tur logro…

E ta kere ku mester selebrá tur logro di e mucha pasobra awe ta esaki mañan ta esaya. Tin hopi mucha mas i p’esei e ta enkurashá tur hóben pa nan sinti nan bon ku nan progreso pasobra progreso ta felisidat finalmente. Den su kaso e ke ta un ‘role model’ pa su yunan. Pa e mustra su yunan ku no ta importá unda bo ta kuminsá den bida pero importante ta pa bo yega i no ta importá kuantu dura pa yega pero djis sòru pa yega. E ta sinti e mesun emoshon ku esun ku a yega promé kuné, importante ta ku el a yega.

 

Bo refleho…

Richeline ta un hende ku hopi hende no sa mes di dje. I asta esnan ku a lesa su pòst ta keda asombrá pasobra ta nèt e. E no tin bèrgwensa pero no tur hende e ta konta su historia. Su koleganan si semper e ta enkurashá nan. No ta importá e refleho ku bo ta mira den spil, kisas bo ta mira ku bo paña ta kibrá pero ta mihó focus pa tin e paña mas adekuá, sin buraku. Mester wak e imágen i no e refleho pa bo yega sigur.

 

Un reto…

Pa loke ta su master el a bisa Djasabra ku e tin di bai den eksterior. Zeerecht ta mas pa Oropa, Suisa òf asta na China. Pero komo tin e pandemia tin un proposishon ku por hasi e estudio ‘online’. I unda ku e hende ta na mundu e por hasi e estudio aki. E no ta mará pa ta den eksterior pero na Kòrsou mes  e por sigui e estudio di Zeerecht. Esaki el a bisa ta su yamada den bida. Ta trata di un lei internashonal i ta poko difísil pero e ta un reto pa Richeline.

 

Loke bo ke bo por…

“Uniko hende ku por yuda bu bai dilanti ta bo mes. E gana di bai dilanti i promé kos ku bo mester ta kere den bo mes. Ni maske kiko bo a bai pe sea siña òf pa trabou, semper na progresá den loke bo ta hasi i hasi loke bo ta hasi ku amor. Na final, kisas awor ta duru pasobra bo ta leu di famia etc., pero na final semper ta un smail. Si bo a traha duru bo sa ku e premio ta di bo. Tin hopi reto riba kaminda, pero purba keda di focus. Tur loke bo ke bo por”, Richeline Koeiman su mensahe.

 

 

LAGA UN KOMENTARIO

Please enter your comment!
Please enter your name here