Grupo Sabiduria;
Grupo Sabiduria ta organisá dia 13 di aprel awor, Walk under the Pink Moon. Un dia yen di aktividat i ku ta klousura ku kaminata bou di luna. Marina Kirindongo i Mariela Sille ta trahando duru ku e grupo aki, organisando diferente aktividat un di nan ta esaki pa rekoudá fondo pa nan por sigui invertí den nos mes hendenan.
10 aña di eksistensia
Grupo di sabiduria ta un grupo di hendenan di 60 aña bai ariba i nan tin 10 aña kaba di eksistensia i a sali for di Family Center. Pero esun ku no ta den e iglesia tambe ta bon biní den e grupo. Nan ta hasi diferente aktividat ku grandinan entre otro nan a bai na Giovanni Abath pa haña un guia. Nan no ke un grupo ku ta djis sinta kombersá, pero nan aktividatnan ta pa e hendenan por siña algu durante ku nan ta keiru tambe. E aktividat próksimo di Walk under the Pink Moon ta unu pa rekoudá fondo pasobra miembronan ta paga 15 florin kontribushon pa luna pero e no ta yega, pa por hasi kosnan di ekselensia nan a disidí hasi un rekoudashon di fondo pa por sigui organisá aktividatnan.
E tiner mas serka di e grandinan
E nòmber di Pink Moon no ta nifiká un luna ros pero kada luna tin un nòmber i esun di aprel yama Pink Full Moon. For di awor aki por wak e luna forma kaba i e tin un tiki kolo ros mas òf ménos pero no ta asina ku e ta bira ful ros. E ta un dia yen ku aktividat manera aerobics riba stul. E ta pa tur edat. Nan ta ferwaktu tur edat na e aktividat. Loke ku nan ke ta pa e hendenan bin i konosé nan, partisipá na e aktividatnan manera e aerobics sinta riba stul. Pa esun ku tin nan krekeché i no por kana por hasié sinta riba stul. Tin informashonnan di salú, di bida. Pa e tinernan nan ke pa nan konosé e grandinan i sa ki balor nos grandinan tin, i ta mas serka di e grandinan.
Disfrutá ku famia
E aktividat ta kuminsá 4 or di atardi te 9 oir di anochi. E kaminata ta di atardi pa anochi i disfrutá di dje i nan ta spera ku famianan kompleto lo por bin huntu i pasa ratu di kalidat ku otro. E tipo di kaminata ‘under the pink moon’ ta pa promé bia. Loke si nan a yega di organisá ta aktividatnan manera bon kuné, staycation di 3 dia, sena di Pasku i nan tin un banda di kas ku ta toka pa e grandinan. E grupo ta konsistí di mas òf ménos 30 hende.
Hopi hende grandi na kas nan so
E tipo di gruponan aki ta masha importante pa saka hende for di kas. Tin hopi hende grandi ta biba nan so, den un soledat, nan so na kas, no tin hende pa kombersá kuné i si tin hende mes e hende ta traha i e ambiente di kas no tur ora ta bon. I p’esei ta importante pa e hende por sali, Fellowship, distraí i no ta keda pensa den e sírkulo visioso den kas so. Ta bon pa nan sali i siña algu i tin un mihó kalidat di bida.
Fellowship
Ora nan papia ku e hendenan den grupo, hopi bia loke nan tin nesesidat di dje ta e Fellowship. Hopi di e hende grandinan a pèrdè nan hendenan, nan ta sinti ku nan ta kla pa laga bai i no ta sali mas. Serka e grupo, e hende nobo ku drenta den grupo nan ta aseptá otro masha lihé. Nan no ta distansia di e hende nobo, pero e manera ku e grupo ta aserka otro ta ku un bon vibra.
Pa muhé i hòmber
Grupo Sabiduria ta pa hende muhé i hende hòmber pero esnan ku mas ta dominá den nan kantidat ta e hende muhé, segun nan a splika Djasabra. Nan ta kere e hende hòmber ta mas reserva i no ta drenta otro manera e hende muhé. I den nan kaso nan ta e kurashi e hende hòmber pa drenta e grupo pa asina disfrutá.
Paisahe bunita
E aktividat tin un kosto di 35 florin karibense mará na dje i bo ta haña hopi pa esaki. Ta bai kana den paisahenan masha bunita di Malpais. Tur kos ta sosodé den naturalesa. E kaminata mes ta kuminsá na e Family Center, pasa den e mondi i pasa kantu di e dam di Malpais, subi kaminda grandi i despues bai kana tambe den e saliñanan. I di einan ta bai bèk e Family Center. E ta tuma lugá nèt atardi ora solo ta baha i mira salida di luna. I pa hóbennan te ku 18 aña ta 15 florin pa registrá. E Family Center ta keda riba e kaminda di Bullenbaai, promé ku yega e entrada pa bai Kokomo tin un kaya na man drechi ku ta bai direkshon di Mount Pleasant i einan e sentro ta i einan tambe e aktividat di dia 13 ta tuma lugá. Pa registrá pa karchi tin un link di Grupodisabiduria riba FB. Tambe e grupo lo tei presente durante di 3 dia na Sambil, ku ta respektivamente djadumingu aki for di 5 or di atardi, djaluna for di 7 or i djárason for di 4 or di atardi. Nan lo bai sinta na e Food Court i na e mesa nan lo sinta i wak e flyer. Einan por registrá i hasi pago.
Meet en Greet
Teniendo na kuenta ku nan 10 aña di eksistensia, nan tin mas aktividat planiá. Grupo Sabiduria lo bai un Meet en Greet den ougùstùs pa envolví pueblo di Korsou kompleto i asina gana mas persona di edat, hende muhé i hende hòmber. Esei ta e meta ku nan tin aktualmente. I e grupo ta unu pa sinta un kaminda i kla pero den nan kaso tin un hende por ehèmpel di 83 aña ta un bailadó. Ora nan tin aktividat lo bo no ripará nan edat pasobra ta hendenan masha alegre.
