CBV:Salubridat a bira ko’i hunga
WILLEMSTAD.-Dirigente sindikal di CBV a bai papia ku e trahadónan di ADC. Sra. Suares-Mathilda a bisa ku e trahadónan tin rason den nan reklamo pero na mes momentu e ta wak e nesesidat di kuido di komunidat. E lider sindikal a duna di konosé ku e no por pidi un trahadó kansá ku e mester sigui.
El a pidi e trahadónan pa atendé e situashon den tur trankilidat. Sindikato CBV tei pa su miembronan i ta sigui atendé e kaso. El a pidi pa ban pensa i tuma desishon huntu.
El a lamentá ku durante di kuater aña el a pidi atenshon pa kuido, pero gobièrnu no a tende ni a kere. Siman tabata hospital CMC ku trahadónan a tene reunion bou di ora di trabou i awor ta ADC. E presidente di CBV ta kere ku pronto lo tin mas instituto den kuido ku tambe lo lanta.
Tur trahadó den kuido tin mesun problema. E kos ta ku salubridat na Kòrsou a bira manera un kos di hunga, nan sa ku e tei, pero no ta hinka esfuerso den dje.
Sra. Suares a pidi trahadónan pa keda riba e stupi di ADC i no bai kana den Otrobanda òf keiru niun kaminda. E por responsabilisá esnan ku keda einan pa nan no pèrdè e dia di trabou.
Walkout trahadónan di ADC Otrobanda
WILLEMSTAD.- For di mainta hopi tempran, riba e djaweps aki, trahadónan di Analytisch Diagnostisch Centrum (ADC), nos laboratorio nashonal, ta den un tipo di akshon. Informashonnan preliminar ta indiká ku e trahadónan di ADC Otrobanda ta pará pafó, riba e stupi dilanti di e edifisio, pendiente di yegada di nan representantenan sindikal.
CBV ta e sindikato ku ta representá e trahadónan di ADC. Aparentemente e motibu di e malkontentu di e trahadónan lo tin di aber ku e kontrato kolektivo (CAO) ku nan ta pendiente di dje. Entretantu mas di e dirigentenan di CBV a yega na e sitio i ta pendiente pa papia ku e trahadónan. Keda pendiente, asina tin informashon konkreto EXTRA lo suministrá esei na nos lesadónan.
