Ketu bai situashon na Venezuela ta keda liña kòrá
WILLEMSTAD. – Seis Venezolano a presentá den sala di korte, akusá di tabata den awanan teritorial di Kòrsou di forma ilegal. Despues ku e tim di Warda Kosta a tuma nota di esaki, nan a bai dirigí riba e boto ku tabata moviendo di un forma sospechoso.
Tabata dia 15 di yüni último, mitar di sinku di mainta ku Warda Kosta a señalá e boto den nos awanan i a dirigí nan mes riba e boto ku tabatin 6 hòmber na bordo.
Ora ku nan a kontrolá e boto, e agentenan a haña un kantidat di bulto ku a resultá den 700 kilo di kokaina, 1 revòlver, 3 pistol, 1 Glock mas munsihon i kashinan di bala. E tim di Warda Kosta a detené tur 6 hòmber di kual tur tabata di nashonalidat venezolano.
Ta trata di e sospechosonan: F.A.V.Q. di 32 aña, J..A.O.Q di 21 aña, V.A.B.S di 28 aña, L.J.C.V di 21 aña, A.J.P.N. di 43 aña i L.E.C.M.di 46 aña di edat.
Resientemente nan kaso a keda tratá pro-forma, pa motibu ku ainda falta algun detaye, segun fiskal. Durante tratamentu di e kaso, tur 6 a presentá den sala di korte. E akusado L.J.C.V a bisa ku e ta diskulpá su mes pa loke el a hasi.
El a splika nunka tabata su intenshon pa hasi daño na e pais aki, pero situashon di nan pais i su famia a pone ku el aseptá pa transportá droga pa e haña sèn pa su famia por kome i tambe ku e por kumpra remedi pa su yu ku ta malu.
El a splika ku e no ke hunga víktima dilanti wes, pero esei ta su bèrdat. E intenshon di dje tabata pa bin Kòrsou pa traha, pero e kosnan a bai otro.
E ta lamentá ku mester posponé e kaso, pa motibu ku e mester traha pa mantené su famia i kada luna ku e pèrdè, ta un luna sin ku su famia por kome. E otro akusadonan, no tabatin komentario den nan último palabra.
Korte huntu ku e abogadonan, a bai di akuerdo pa posponé e kaso te dia 1 di febrüari binidero.
