WILLEMSTAD.-Wardakosta ta informá ku djasabra anochi, 19 di aprel, e Sentro Operashonal Marítimo di Wardakosta (MOC) a risibí un yamada for di Klein Kòrsou pidiendo asistensia médiko. Ta trata di un hende hòmber (38) ku a dal su kabes i tabata rekerí asistensia médiko. Personal di MOC a tuma kontakto ku e dòkter di CITRO ku a konstatá ku e mihó opshon pa e persona tabata pa transport’é, pa asina e por risibí tratamentu médiko na CMC. Inmediatamente a informá e personal di e helikòpter di Wardakosta ku a sali ku rapides den direkshon di Klein Kòrsou, pa asina transportá e pashènt HATO (Kòrsou). Personal di ambulans tabata presente pa transportá e persona pa e por risibí tratamentu médiko na Curaçao Medical Center (CMC).
