WILLEMSTAD.- Den ora nan trempan di djaweps mainta (18 di sèptèmber) Sentro Operashonal Marítimo di Wardakosta a tuma nota di un kontakto sospechoso nabegando for di zùit, den direkshon di Klein Kòrsou.
Inmediatamente a alerta personal di Punto di Sosten Kòrsou pa asina sali ku un Metal Shark den direkshon di e boto. Tambe a pidi sosten di personal di helikòpter ku a sali ku rapides pa investigá e situashon.
Na momento ku a yega serka di e boto, a tuma nota ku ta trata di un boto piskadó lokal. Personal di Wardakosta a disidí di bin bek ku e boto, i e dos persona nan, pa asina por hasi un kontrol riguroso na base di Wardakosta Parera. Huntu ku personal di Duana i asistensia di nan kachó a logra di haña un kantidat grandi di pakete. Ta trata di aproksimadamente 230 Kilo di kokaina.
E dos persona nan riba e boto huntu ku e droga a ser entrega na personal di polis pa sigui ku e investigashon. Miéntras tantu a destruí tur droga.
