WILLEMSTAD – Den ora nan di djadumingu mainta 25 di ougùstùs, sentro operashonal marítimo di Wardakosta a tuma nota di un boto ku komportashon straño riba laman serka di Kòrsou. A pidi un unidat di Metal Shark pa interseptá e boto i tambe a hasi uso di un helikòpter pa analisá e situashon. Ta trata di un boto piskadó lokal ku dos persona lokal na bordo. A disidí di hiba e boto i personanan base di Wardakosta na Parera pa inisiá un kontrol profundo riba e boto. Durante di e kontrol kondusí pa miembro nan di Wardakosta i Duana di Kòrsou, a tuma nota di un kantidat di narkótiko riba e boto. Tambe a hasi uso di un kachó di Duana pa asistí ku e kontrol. Ta trata di un kantidat di aproksimadamente 245 kilo di kokaina kual a haña na bordo. A detené i entrega e dos persona nan na polis i a konfiská i destruí tur droga.
