CORONADO, CALIFORNIA, MERKA, AP.- Efektivonan di Wardakosta di Merka a subi riba un semi supmarino miéntras esaki tabata move durante un di e 14 operashonnan pa konfiská kokaina i mariwana kual ta wòrdu realisá desde mei entre México, Sentro i Suramérika.
E agensia a dibulgá un video espektakular di e enkuentro ku kontrabandistanan. Un boto di wardakosta a aserka e supmarino, un efektivo di wardakosta a subi riba esaki i bati riba tapa di e entrada miéntras ku esnan na bordo a rendi ku man na laira.
Wardakosta a indiká ku e kokaina i mariwana, ku tin un balor di 569 mion dòler a wòrdu konfiská den operashonnan realisá durante e último dos lunanan aki.
35 persona a wòrdu arestá.
Aparte di esaki a dibulgá imágennan di wardakosta hundiendo e botonan di e narkotrafikantenan.