ROLLING FORK, MERKA, AFP.- Mississippi, afektá pa mal tempu, a lucha djadumingu ku e konsekuensianan di un warwarú enorme ku a asotá e estado na sùit di Merka i mata por lo ménos 25 persona, ku komunidatnan destrosá ku ta preparando pa un episodio nobo di klima ekstremo.
Ekiponan di reskate a inspekshoná e dañonan entre kasnan destrosá, edifisionan ku a kolèps i outonan entre un monton di ruina den siudat di Rolling Fork.
Entre e operashonnan di búskeda i reskate, i despues ku presidente Joe Biden a deklará un emergensia ku a aprobá un yudansa pa desasternan, e habitantenan di Mississippi tabata preparando djadumingu pa mas tormentonan ku segun Servisio Meteorológiko Nashonal (NWS) por trese warwarúnan fuerte, bientunan dañino i hagel kasi mesun grandi ku un bala di tènis.
Bintisinku persona a muri segun e agensia di maneho di emergensia di Mississippi.
Desénas di persona a sali leshoná i outoridatnan ta bisa ku e kantidat di mortonan por sigui oumentá.
NWS a bisa ku e warwarú ta un kategoria kuater di un total di sinku riba eskala di ‘enhanced fujita’, ku bientu fuerte di 200 mia pa ora.
