Akshon di protesta den Washington kontra di presensia di Guardia Nasohnal, manera a keda disidí pa presidente Donald Trump
WASHINGTON (AFP).- E siudat di Washington a presentá un demanda kontra di presidente Donald Trump i su gobièrnu pa e presensia di forsanan federal den e kapital norteamerikano. E medida ei, ku segun e propio alkalde dje siudat ta rekonosé ku a kondusí na bahada di kriminalidat, tòg ta un “okupashon militar imponé ku ta bai mas leu ku e poder ku e presidente tin”.
Medio ougùstùs, Trump a disidí pa manda tropanan federal Washington pa “limpia” e kapital norteamerikano, ku segun su persona “ta pèstá ku gèngnan violento”. E presidente republikano a menasá na hasi e mesun kos den otro siudatnan grandi dje pais, tur goberná pa demokratnan: Chicago, New York, Baltimore i, mas resien, New Orleans
E fiskal di Washington, Brian Schwalb, ta akusá en partikular e gobièrnu, di “ta usa ehérsito di forma ilegal pa mishonnan di mantenshon di òrdu”. Djamars último, un hues federal den California a konsiderá ku ta ilegal ku Trump ta manda militarnan Los Angeles durante e protestanan kontra di su polítika migratorio represivo. “E despliegue di Guardia Nashonal pa partisipá den mantenshon di órden no solamente no ta nesesario i indeseabel, sino tambe peligroso i perhudisial”, segun Schwalb ta bisa den un komunikado. “Ningun siudat norteamerikano mester mira ehérsito di Merka ta patruyá den su kayanan. Awe ta Washington, pero mañan por ta kualke otro siudat”, segun e ta atvertí. “Nos lo bai over na akshon hudisial pa pone fin na e abusu di poder federal”, segun el a agregá.
E demanda ta bai dirèkt kontra di Trump, su sekretarionan di Defensa, Pete Hetseth, i di Hustisia, Pam Bondi, komo tambe kontra di Pentágono.
