WILLEMSTAD. – Ayera 15 di òktober Kòrsou tambe tabata tin su “wave of light” kaminda mama, tata, tanchi, tio i famia kompletu a bin huntu honrando pèrdida di embaraso i tur beibinan i yu nan ku a bai muchu trempan.
“The Losing Zayn Gaining an Angel Foundation” huntu ku e tim di El Tributo ta organisá e evento aki pa di 8 aña konsekutivo.
Tabata un atardi yená ku emoshon kaminda tur persona por a sende un bela simbóliko ku ta representá nan yu òf ser kerí ku a bai muchu trempan, tambe por a disfrutá di un bunita presentashon di CJ Opus.
“The Losing Zayn Gaining an Angel Foundation” a hasi uso di e oportunidat aki tambe pa estrená e docudrama; Inisio Silensioso.
Oktober ta e luna di konsientisashon tokante pèrdida di embaraso i beibi.
“The Losing Zayn Gaining an Angel Foundation” ta e promé grupo ku a wòrdu kreá kaminda ta habri espasio pa famianan ku a eksperensiá e pèrdida doloroso aki por bini huntu den un grupo safe kaminda tur hende tin komprenshon pa otro i ta identifiká nan mes ku otro pa asina por ekspresá nan sintimentu nan i papia tokante di e tema kual ta un tabú.
Meta di e grupo ta pa sali i duna sosten na mayornan ku a eksperensiá e pèrdida aki personalmente i tambe kibra e silensio ku tabata rondoná e tópiko aki na Kòrsou.
Hopi bia nos ta konsentrá riba e mama ku a pèrdè su yu, pero e Fundashon aki ta duna atenshon na e tata nan tambe ku ta biba esaki i hopi bia ta keda ketu pasó nan no sa kon nan tin ku dil ku nan emoshonnan.
