Hues a manda Federashon di kuido i CBV pa sinta na mesa ku otro


…Henk Kamsteeg director di SGR Group…

WILLEMSTAD.- Hues mr. Christiaan ta esun ku ayera a trata e kaso di huisio sumario ku e representantenan ku ta kai bou di e Federashon di kuido, a entamá kontra di e trahadonan/miembronan di CBV, mirando ku nan a pone trabou abou, eksigiendo un splikashon pa e kambio di kompania di seguro, pa ku un otro kompania, relashoná ku nan penshon.
Ayera tabata e di dos dia ku e trahadónan a pone trabou abou, pa motibu ku na nan pareser e Federashon di kuido a falta nan rèspèt dor di firma akuerdo ku un otro kompania di seguro sin konsulta ku nan.
Representante nan di e federashon den korte a splika ku esaki ta algu ku por, mirando e CAO ku ta bisa ku kada 5 aña e doño di trabou por hasi kambio na e reglamentu di penshon, despues di evaluá i ku e seguransa ku lo no mishi ku penshon di e trahadónan. E representantenan di e Federashon a splika ku nan a duna presentashon na vários trahadó via “PowerPoint”, kaminda representante di Ennia i Guardian tabata presente pa duna splikashon. Pero aparentemente no ta tur hende a komprondé. Federashon tin un total di 1200 hende ku ta traha bou di nan di kual 800 ta miembro di CBV. Ayera mas o ménos 120 a reanudá trabou kaba.
Segun representante di CBV ,mr Asjes, el a bisa ku ta na novèmber numa e Federashon a trese esaki dilanti na e trahadónan i kasi kabamentu di desèmber a bin ku seshon di presentashonnan. Segun Asjes, no a manda niun muestra di e ofertanan di e kompanianan di seguro pa e miembronan por wak i evaluá.
Mas aleu el a sigui duna di konosé ku tin hendenan ku tin mas ku 20 aña ta traha i a forma nan penshun i ku ora nan pasa over nan lo kuminsá na 0. E representantenan a lamentá ku e Federashon no a presentá pa sinta na mesa ku minister Camelia-Römer. E Federashon na nan turno nan a splika ku mirando ku nan a entamá un huisio sumario kontra e trahadónan, nan a manda bisa e minister ku nan lo warda te ora e huisio sumario terminá. Direktor di SGR, Henk Kamsteeg a splika ku nan ke sinta na mesa ku miembronan di CBV, pero ku nan lo no ke hasi esaki bou di e preshon di wèlga di e trahadónan. Hues Christiaan na su turno a para ketu un ratu i a puntra e representantenan di CBV e visepresidente sr. Hector Bonafacia, unda e doló eigenlijk ta sinta di e trahadónan, kiko konkreto nan ke sa. Bonafacia a duna di konosé ku e trahadónan kier un splikashon mas amplio promé ku nan stap bai over na e otro kompania di seguro. E fecha definitivo lo ta 20 di yanüari pa despues stap over na e otro kompania. Hues a bisa ku e úniko kos ku e por disidí ta ku e trahadónan ta bai traha bek si òf no. Pues e no por disidí si ta para e stap over pa e otro kompania di seguro .
Esei nan mes tin ku regl’e sinta na mesa ku otro pa yega na un punto pa ku e trahadónan por haña mas informashon.
Segun hues Christiaan, e loke e ta sinti ta insiguridat den e trahadónan, miedu i angustia i ku nan ke ta sigur di nan sèn di penshon. Mirando esaki el a duna ámbos partido 5 minüt pa nan representantenan den personanan di abogado Asjes i De Windt, yega na un akuerdo entre e partidonan. Despues di a deliberá ku miembro di kada partido, Federashon di kuido a bisa ku nan lo skùif e fecha definitivo di 20 di yanüari pa 25 di yanüari, ya asina nan por informá e trahadónan mas mihó riba e kambio di kompania di seguro di nan penshon i splikanan tambe kon e situashon di nan penshon lo bai ta.
El a bisa ku e desishon lo no kambia, pero si nan lo duna un splikashon. Mayan ámbos partido lo bai sinta na mesa ku otro pa kuminsá duna informashon na e trahadónan pero e bia aki den sekshonnan mas chikí.

…Trahadónan di den kuido pa drenta kaso huisio sumario ku Federashon di kuido a entamá kontra nan…


SHARE

LEAVE A REPLY