WILLEMSTAD.- Betesda a gana e huisio sumario ku el a entamá kontra di dr. Natasha Rog-Wanner i su konsultorio pa lanta e beslag ku e dòkter a laga pone te asina leu ku a logra su meta, pa un suma total di mas di Cg33.000. E tin di kita e beslag ku tin riba kuentanan di Betesda na MCB komo tambe SVB. Tambe dr. Rog a pèrdè e petishon ku el a hasi kontra di Betesda pa kumpli ku pago di su práktika.
Djamars último trahadónan di Betesda a drenta den akshon debí ku dr. Rog a laga pone beslag riba su kuentanan. Esaki a okashoná ku trahadónan no por a kobra nan salario. Djárason Betesda a entamá e huisio sumario pa lanta e beslag. Tambe minister di salubridat sr. Tyron Boekhoudt a regla pago di salario di trahadónan, miéntras ku dr. Rog-Wanner na final di tratamentu di e huisio sumario a lanta un parti di e beslag pa paga salario na trahadónan. Pero e sentensia di wes un ratu pasa ta dikta ku e dòkter mester lanta e beslag kompleto kontra di Betesda. Mas detaye di e sentensia aki den bo korant EXTRA di mañan mainta.
