Si e bolbe faya, e ta bai será

WILLEMSTAD.- Wes a duna e akusado F.K.(21) un chèns, despues ku fiskal a hasi demanda di kastigu di prizòn pe.

F.K. ta keda akusá pa kómplise di ladronisia den un bibienda. Durante tratamentu di e kaso e akusado a ninga di tabata sa di e ladronisia. El a splika ku ta un fabor el a bai hasi su amigu di infansia. E amigu a yam’é i bis’é ku su outo a  daña i bin pe bai hasi fabor kuné.

Segun e akusado ta ora el a yega pa buska e akusado, el a hañ’é  ku dos otro hòmber mas. Nan a kita su plachi number i despues bis’é kiko ta nan plan.

E akusado a bisa ku e no por a hasi nada mas, pa motibu ku nan a menas’é i tambe su famia. E mester a  fungi komo shofùr  di e vehíkulo i mester a para warda e hòmbernan baha hòrta den e kas. E doño di e kas a  kore yega nèt na e momento ei. Esei a pone ku e hòmbernan a spanta i kore drenta e vehíkulo. Polis a blòkia nan i detené nan.

Fiskal a duna di konosé ku e ko-akusado a deklará ku fo’i tempran el a bisa e akusado F.K. di e ladronisia i  el a bai di akuerdo pa partisipá.

Segun fiskal si e no tabata sa mes, dikon ora el a haña sa e no a kore bai. El a keda warda nan den outo sin hasi nada. P’esei e no ta kere den su deklarashon.

Fiskal a bisa ku ladronisia den kas tin kastigu  di 3 aña òf mas mara na dje. Esaki pa motibu ku un hende mester sintié ‘save” den su propio kas. Banda di esaki, un hende ta traha duru pa yega na su kosnan i otro hende ta kibra i drenta i bai ku nan, lagando trouma pisá atras i  ku pa largu tempu e víktimanan ta keda ku miedu di drenta den nan bibienda.

Fiskal a bisa ku e ta tene kuenta ku  edat di e akusado, tambe ku e ta “first offender” i ku su ròl tabata shofùr di e vehíkulo di fuga. Mirando esaki fiskal a yega na un demanda di 18 luna di kual 6 kondishonal ku un periodo di prueba di 3 aña.

E akusado a bisa den su último palabra ku el a hañ’é den e situashon aki. Segun e akusado, el a hañ’e obligá ta partisipá den e ladronisia kontra su boluntat. El a pidi wes pa no mand’é prizòn, pero dun’é un chèns pa e kaba su skol.

Despues di a bai deliberá, wes a bisa ku e no ta kere ku gewon e akto a bai asina sin ku e akusado a risistí. Segun wes, e ko akusado ta bisa ku e akusado  tabata sa e loke tabata bai pasa.  No tin prueba ku e ko akusadonan a  menas’é.

Wes a bisa ku pa loke ta trata e  parti di ladronisia den e bibienda, e ta keda apsolvé di kulpa, pero si ta keda akusá  pa kómplise.

Segun wes e ròl di e akusado ta hopi chikitu den e kaso aki.

Na final wes ta yega na kondena di 12 luna kondishonal, mas 200 ora di trabou  pa e akusado sinti ku loke el a hasi no ta korekto, mará na un periodo di prueba di  3 aña.

Wes a atvertí e akusado ku e bia aki el a sali di bon for di  kaso i si e bolbe hañ’é den man di hustisia, el bai será.

LAGA UN KOMENTARIO

Please enter your comment!
Please enter your name here