WASHINGTON (AFP).- Ayera un wes federal di Merka a kanselá dos kaso penal presentá kontra di èks-direktor di FBI, James Comey i kontra dje fiskal general di New York Letitia James, dos opositor grandi di presidente Donald Trump. E wes Cameron Currie a kanselá tur dos kaso ku e argumento ku e fiskal designá pa Trump i kende a presentá e kasonan, Lindsey Halligan, a keda nombrá di manera ilegal.
Comey (64) a keda akusá den sèptèmber pa a duna deklarashonnan falsu den Kongreso, den loke hopi ta konsiderá komo un kampaña di represaya dje presidente kontra di su oponentenan polítiko. James (67), un demokrat kende ku éksito a prosesá Trump pa froude, a keda akusá den òktober di froude bankario i tambe di a duna deklarashon falsu na un institushon finansiero. Tur dos akusashon a keda presentá pa Halligan, un fiskal sin hopi eksperensia i kende den pasado tabata abogado personal di Trump.
E akusashon kontra di Comey a tuma lugá na momento ku e fiskal federal pa Distrito Ost di Virginia, Erik Siebert, a renunsiá despues ku supuestamente el a informá funshonarionan haltu di Departamento di Hustisia ku no tabatin sufisiente prueba pa akusá Comey. E fiskal general, Pam Bondi, a remplasá Siebert ku Halligan, kende a presentá e kaso dilanti di un ‘grand jury’ i a hasi un akusashon formal.
E prinsipal fiskalnan federal generalmente mester keda konfirmá pa Senado i Currie a diktaminá ku Halligan a keda nombrá sin ku a sigui e pasonan legal.
“E intento di fiskal general pa pone fiskal Halligan komo fiskal interino di Merka pa Distrito Ost di Virginia tabat inbalido”, segun e wes. “I komo ku señora Halligan no tabatin outoridat legal pa presentá e akusashon formal, lo mi konsedé e moshon di sr. Comey i ta retirá e akusashon”, segun el a agregá.
