Djarason último
WILLEMSTAD.- Djarason último a instalá eks promé minister Bernhard “Ben” Whiteman ofisialmente komo e presidente nobo di Krus Kòrá. Esaki despues ku na komienso di e aña akí a kai un bashí den direktiva di e organisashon i a hasi un apelashon riba su persona pa e yuda.
Whiteman su kurason ta bati pa Krus Kòrá i for di 1984 e ta miembro di e organisashon. Durante di aña Whiteman a yuda den diferente funshon. Promé komo komandante di fèlt, despues komo “colone commandant”, i último akí komo konsehero di e direktiva.
Tabata a base di aserkamentu di miembronan di e organisashon ku a pidi Whiteman pa e pone su mes disponibel pa e funshon di presidente. Despues di evaluá Whiteman a disidí ku e ta bai pa e reto. Den reunion general na komienso di sèptèmber miembronan a skohe Whiteman komo miembro di direktiva i den reunion di 9 di sèptèmber di direktiva a nombra su persona komo presidente.
E instalashon ofisial di Whiteman komo presidente di e direktiva a tuma lugá djárason anochi 30 di sèptèmber. Asina Whiteman mes ta splika den e podcast 3’or ku Gino.
Krus Kòrá a lanta na Suisa komo un organisashon pa duna ayudo humanitario den kaso di desaster. E organisashon a plama rònt mundu i bira un organisashon internashonal. Krus Kòrá ta drenta den funshon tur kaminda na mundu kaminda mester di ayudo humanitario.
E promé tarea ta pa preservá bida i logra ku ta mehorá situashon di e hende i despues entregá nan na ayudo profeshonal. Poko poko ku tempu Krus Kòrá a amplia den su tareanan i asta ta yuda ku drecha kas pa víktimanan di desaster. Na 2010, despues ku rasgonan di orkan Tomas a pasa riba Kòrsou, tabatin hopi kas den área di Monte Carmelo ku a sufri daño.
Krus Kòrá Kòrsou a yuda den drecha e kasnan akí.Promé ku Tomas, Whiteman ta splika, tabatin un warwarú i ku a kousa daño na daknan di kas den Juan Domingo i Kolegio Ehekutivo e tempu ei a pidi Krus Kòrá pa duna un man i drecha daknan di kas. Ta duna e tipo di asistensia akí a base di trabou boluntario.
Kolaboradónan di Krus Kòrá, ku un eksepshon di 2 miembro di direktiva, ta traha komo boluntario. Durante añanan Krus Kòrá mes a profeshonalisá su kolaboradónan pa asina nan por traha riba ambulansnan ku e organisashon tin. Tambe nan mester por traha ku ekiponan ku ta usa den kaso di emergensia, por ehèmpel ora un persona haña un ataka di kurason.
Tin mas ku 140 nòmber riba e lista di miembro, pero no ta tur hende ta mesun aktivo henter aña. “Ta ora tin un desaster ta haña sa kon fuerte e organisashon ta na boluntario”, Whiteman ta deklará. Tambe t’asina ku ora tin ku mobilisá hende, doñonan di trabou ta kooperá i duna trahadónan ku ta boluntario di Krus Kòrá liber pa nan por yuda den duna asistensia.
A base di eksperensia ku asistensianan ku Krus Kòrá a duna den pasando ora ku tin kualke desaster den region, Whiteman ta bisa ku por konta ku un núkleo di entre 45 pa 50 persona ku semper por stèns riba dje. Pero, e miembresia ta hopi mas grandi.
