4.400 boluntario i 289 proyekto a uni Kòrsou riba 15 i 16 di mei — i e lema ku a nase na 2014 ta sigui na vigor
WILLEMSTAD.- Tin frasenan ku no ta gasta. Dun’un man, gan’un kurason ta un di nan. For di e promé edishon di CURA DOET na 2014, e palabranan aki ta e kurason di un wikènt ku awe ya ta forma parti di e identidat di nos isla.
Riba 15 i 16 di mei 2026, e frase aki tabata bibu un biaha mas. Mas ku 4.463 boluntario a uni forsa pa realisá 289 proyekto na 255 organisashon sosial rònt henter Kòrsou. Pero tras di e sifranan, tabatin algu mas profundo: e sintimentu ku diestres aña di “hasi bon” a transformá e wikènt aki den un sita ku Kòrsou tin ku su mes.
Djabièrnè mainta, poko despues di shet’or den un lugá di kuido, un famia ta traha huntu. Den un skol, un mayor ta yuda pinta liña di un wega riba plenchi di skol. Den un sentro di bario ta muzik ta zona; Na un klup di scouting ta wòrdu limpiá; den un kas di kuido ta kushiná; riba un vèlt di deporte ta harpa; den un biblioteka bukinan ta wòrdu organisá di nobo. Mas ku 289 di e tipo di gestonan aki na mes momentu rònt Kòrsou. Un tiki mas ku 4.000 persona, tur yudando ku e mes un meta.
Manera tur aña, boluntarionan ta mobilisá masalmente, grupo di amigu, famia, kolega, klas di skol, grupo di misa, grupo di scouting, ekipo di deporte. Kompanianan a hasi nan trahadó, nan rekursonan i nan tempu disponibel pa un bon kousa. Skolnan a mobilisá nan studiantenan — un generashon nobo, ku kisas no ta kompletamente konsiente ainda, ku nan ta e diferensia den nos komunidat aki un par di aña.
CURA DOET ta parti di e akshon boluntario di mas grandi den Reino Hulandes, huntu ku ARUBA DOET, BON DOET, STATIA DOET, SXM DOET, SABA DOET i NL DOET. Pero tras di e kalènder kompartí ku otro islanan, tin algu ku solamente Kòrsou por bisa: di 132 proyekto na 2014, pa 289 awe; di mas ku 2.600 boluntario na e promé edishon, na míles ku awor ta yega tur aña di nobo. Loke e sifranan no por mustra ta ku Kòrsou — un isla ku tantu bes a wòrdu pidí pa tene pasenshi ku krísis, ku presupuesto, ku promesanan ku no semper a yega — ta sigui skohe pa duna sosten na un otro. Pa traha huntu. Pa duna sin spera nada bèk.
Algun tradishon a keda firme. E Gabinete di Gobernador a partisipá un biaha mas, un gesto ku no a falta for di e promé edishon. Diferente organisashon sosial a partisipá kasi tur edishon di 2014 te awe. Kasnan di grandi ku un dia a risibí nan promé aktividat speshal, awor sa ku e di dos wikènt di mei ta un fecha ku nan ta warda ansiosamente riba dje.
E organisashon di CURA DOET ta den man di Curaçao Cares Foundation, ku sosten di Oranje Fonds i Reda Sosial. Ku diestres aña konsekutivo a logra sigui ta posibel, ta danki na e kompromiso konstante di tur partner, spònser, organisashon sosial, kompania, skol i boluntario ku a forma parti di e historia. Esei mes ya ta un historia — un ku ta kuminsá ku sifra i fecha, pero ku ta keda biba den rekuerdonan bunita.
Despues di diestres edishon, tin algu ku ta kla. CURA DOET no ta solamente un wikènt. No ta solamente un evento. Ta un regalo ku Kòrsou ta sigui duna su mes, un manera di rekordá ku loke ta pasa entre dos hende, un kòmbersashon, un man, un ora kompartí, ta un di e kosnan ku mas balor ku un komunidat por tin.
Danki na tur boluntario ku a kontestá e yamada pa yuda. Danki na tur organisashon ku a habri nan portanan pa risibí e boluntarionan. Danki na tur kompania ku a duna nan hendenan e tempu liber pa yuda. Danki na tur skol ku a mobilisá nan studiantenan. Danki na tur partner ku a kana huntu ku nos.
I danki spesialmente na tur hende ku, for di e promé edishon na 2014 te awe, a komprondé loke e lema mas bieu di CURA DOET ta nifiká: ku un solo man, di bèrdat por gana un kurason.
