WILLEMSTAD.- Wild Cats Guardian Group/KJ 74 ayera tardi a habri aña ku un selebrashon serka nan spònser Guardian Group. Un selebrashon pa 50 aña di e ekipo, pero tambe pa nan título di kampion 2016 i na mes momento a probechá pa firma tres atkisishon nobo ku mester yuda e ekipo pa prolongá e título di kampion.
Huntu ku tur e selebrashon ei, Wild Cats a duna rekonosimentu na tantu dirigentenan di mil kampaña dje ekipo komo tambe na algun pelotero ku a graba nan nòmber pa semper den historia di e ekipo.
Interesante tabata sigur e presensia di Kenley Jansen kende ta un dje spònsernan di e ekipo i ku a dirigí palabra na e okashon ei, aksentuando su aporte na beisbòl lokal mediante e sponsorship aki. E pitcher di LA Dodgers a ekspresá su satisfakshon pa e resultado ku nan a logra aña pasá.
Di parti di Wild Cats nan a duna homenahe na Kenley Jansen, tambe na Swini Gomes komo fundadó di e ekipo, na Clovis Lodewijks ku tambe ta un dje dirigentenan di promé ora i eks-presidente Oscar Bolivar.
Seguidamente a pone atenshon na tres pelotero grandi di tur tempu i a rekonosé nan pa e aporte ku nan a duna na e ekipo. Ta trata di figuranan legendario di beisbòl lokal, manera Antonio Keller, Renato Anasagasti i Remick Bernadina.
Otro momento importante tabata e firmamentu di tres hungadó nobo ku lo ta riba tereno ku Wild Cats den 2017. Ta trata di Rayen Fecunda, Rowendley van Gurp i Rodelly Manuel.
Sekretario Giovanni Atalita a duna di konosé na Mundu Deportivo ku e refuersonan aki sin duda algun lo yuda e ekipo pa start un periodo nobo di vários título. Na 2016 tabata despues di diessinku aña ku Wild Cats a titulá kampion.
