Wintertuin; konektá arte i kultura

Joella Inecia

Luna di sèptèmber, ta luna di festival Wintertuin. Tantu esun pa mucha komo esun mas pa adulto. Joella Inecia un tempu a yega di tuma parti na e festival i e aña akí e ta den e organisashon mes. Aunke un poko trempan, el a konta nos tòg algun kos ku nos por spera na e dos festivalnan aki. Esaki ta bira e di 8 edishon di festival Wintertuin. Dia 12 di sèptèmber ta tuma lugá e Wintertuin Kids. Esei, manera Joella a splika, ta un evento ku tin tur kos pa mucha. Diferente aktividat pa nan ekspresá nan mes, pa nan siña abilidatnan nobo manera skibi i muzik. Esun di adulto ta 19 di sèptèmber ku diferente artista, ekspreshon, kontamentu di kuenta kaminda hende grandi i mucha por disfrutá.

Festival pa mucha

E aña aki e festival pa mucha ta diferente. Na vários okashon el a tuma lugá na Museo di Kòrsou pero e aña aki e lo ta na Emmastad, na e sentro di kampamentu di skoutnan. E motibu dikon e kambio aki ta pasobra e aña akí e tema ta moveshon. I mester a skohe un lokalidat di hòfi i naturalesa pa e muchanan konektá ku naturalesa i aktividatnan pa move. Ta trahando ku diferente organisashon den arte ku ta hasi presentashonnan pero tambe lo tin aktivistanan di obra di man. Traha kortina, ‘beats making’, talento, siña toka instrumento, ta un totalidat kaminda e mucha por desaroyá su mes. I ora nos ta papia di edat, nos ta referí aki na mucha di 0 pa 15 aña, di 4or di atardi pa 8or di anochi. I manera tur aña ta spera ku e lugá lo ta yen i manera a kustumbrá tambe ora e orario di finalisá yega, e muchanan no ke bai. Esei ta mustra kon nan ta gusta e aktividatnan i nan a disfrutá.

Esun di hende grandi Wintertuin Festival ta 19 di sèptèmber i su lokalidat a keda meskos esta lanthùis Vredenberg, ku a bira praktikamente manera e kas di e festival. E aña akí na esun di adulto lo tin entre otro artista di Brasil, ku ta tòg otro for di pasado. Lo tin presentashon di buki ku otro artista tambe pasobra tur aña Wintertuin ta duna oportunidat na otro artistanan. I e aña aki no ta diferente. Wintertuin lo purba trese artista nobo. Pero lo tin diferente aktividat, lo tin presentashon kultural i gruponan kultural ku presentashonnan mas nochi. Tin diferente esenario manera e Veranda ‘stage’, Mondi ‘stage’ i e Ambiente ‘stage’. Ambiente sigur lo bai tin na e Ambiente ‘stage’ ku gruponan musikal. Ta un enkuentro entre kultura i arte.

Pusha eskritornan skondí

Wintertuin, manera nos a kustumbrá, ta hopi dirigí riba e parti di pusha e eskritornan skondí pa nan skibi nan mes buki. Te ainda Joella no por a menshoná ken lo t’ei pero si e por a menshoná Tina Krolis ku lo presentá su buki i lo tin hopi artista lokal i di afó. Lo tin ‘spoken words’, poesia. Lo tin pènel ku tópikonan interesante. Ta un evento multikultural ku diferente idioma ku no ta papiamentu so. Tur hende por sinti nan mes bon biní pasobra tin algu pa kada un.

Karchi ya ta na benta

Na e parti di ambiente, por bisa ku lo tin un pista di baile sigur i p’esei ta pidi tur hende pa trese nan sapatu pasobra lo bai tin tambú, seú i lo lòs laga bai. Diferente generó i presentashonnan. Un biaha mas algu pa tur hende gusta. E Wintertuin Festival ta di 6or di atardi te 12or di mardugá i manera tambe a bira kustumber karchi ta kaba i hende ke drenta i esnan paden lo ke keda mas lat ku 12or. Ya kaba karchi ta na benta na Mensings, van der Tweel i riba Caribbean Online shop. Joella ta pidi tur hende pa kumpra nan karchi na tempu pasobra tur aña e evento akí ta yena kompletu i karchi ta kaba.

E aña akí tambe e festival lo kooperá ku instansianan manera Totolika pa por haña karchi. Segun Joella, awor nan ta bai kuminsá ku e trayektoria akí pa asina e instansianan por haña karchi grátis pa duna nan klientenan/muchanan.

Di presentá pa organisá

Joella na 2025 tabata un di e presentadónan. El a skibi poesia i a presentá esakinan. For di mucha e tabata gusta ekspresá su mes. Komo úniko yu, e tabata masha kreativo i e pashon pa arte a kuminsá. Na skol sekundario tabatin un materia literario i einan el a skibi su promé poesia ku 15 aña. I einan el a kaba enamorá i a bisa su dosente ku e lo tin su buki un dia. Algun aña despues el a kuminsá deklamá i a skibi su buki ku sosten di Wintertuin. E ta skibi hopi di su emoshonnan, pensamentunan i kosnan ku ta pasa den bida. El ripará ku ora e presentá su poesianan hendenan tabata aserk’é, pasobra ta kosnan ku nan tambe tabata eksperensiá. El a ripará ku e no ta traha arte pa su so pero e ta traha arte pa otronan por konektá ku nan mes. I p’esei el a bisa ku e mester sigui i asina el a hasi hopi. Wintertuin a dun’é e plataforma pa aña pasá e hasi esaki komo artista i ku tambe el a sigui kurso di skibimentu.

Biba pa krea

Joella a bisa ku su poesianan primordialmente ta na ingles pero e último 2 añanan  el a kuminsá skibi na papiamentu tambe. Joella a bisa ku e ta laga bida inspir’é. Semper e ta bisa ku bo tin di biba pa krea i p’esei ta laga kosnan ku pas’é no solamente negativo pero tambe positivo pa e skibi. E ta haña ku bida ta un lès i e ta purba hiba esakinan den su arte.

Buki di poesia

Su buki di poesia ta na kaminda. Komo e ta skibi hopi di eksperensianan humano, e lo traha tópikonan ku tur hende ta eksperensiá manera famia, amor etc. etc. Lo ta un buki ku tur hende por gosa di dje. E lo purba hasié na ingles pero tambe na papiamentu pasobra papiamentu ta bunita i mester purba preservá esei. Nos lenga ta bunita i e ke inmortalisá esei den e un buki.

Ku smak i pashon

Aktualmente e ta forma parti di e tim di produkshon di Wintertuin. El a hasi Kurá di Kuenta Montaña e aña akí kaba kaminda tabatin publikashon i presentashon di e buki di grandinan ku pa un aña largu a bin huntu pa traha i skibi historianan ku nan a eksperensiá. Esaki a pone den un buki pa kultivá nos historia. Asina el a sigui ku smak i pashon pa tur loke e ta hasi.

E yamada pa arte

Joella mes no a studia den arte pero a hasi International Business, pero semper for di chiki e tin e yamada pa ta artista. El a sigui desaroyá su mes den dje i esaki ta su pashon. E no por biba sin dje, si e no por hasi nada mas den mundu, e por hasi esaki. Den su trabou e ta purba trese un ángulo kreativo i Wintertuin ta yuda den esaki.

Apresio pa artistanan

Pensamentu kon e ke ta aki 5 aña, Joella a bisa ku resientemente el a kuminsá ku su kompania, i e meta ta pa e tin su studio na Kòrsou kaminda tin tur kos kreativo, produkshon i aportá na komunidat. Sea via di arte òf proyektonan manera esaki. Joella a bisa ku tempu el a kuminsá el a sinti falta di e aporte i sosten di nos pueblo na artistanan. Arte visual ta hopi mas fásil pa bende i aserká pero último aña tin hopi desaroyo i nan komo eskritor ta sinti e sosten pa sigui hasi loke nan ta hasiendo. Si mira eventonan manera Wintertuin, e ta konkluí e balor i apresio pa loke nan komo artista ta hasi. Semper tabatin eskritornan grandi i nan komo hóben ta kontentu di mira kon nan tambe ta keda apresiá den sosiedat.