Joeri Oltheten den EXTRA Djasabra
Riba 14 i 21 di sèptèmber lo tuma lugá e di seis edishon di Wintertuin Curaçao Festival, e festival internashonal di kuenta den tur forma. Den e delaster añanan, e festival aki a bira un evento kultural prominente riba nos isla. Riba 14 di sèptèmber lo tin e programa pa mucha na Museo di Kòrsou; esaki ta e festival pa mucha di mas grandi di Kòrsou ku aktividat pa mucha di 2 te ku 12 aña i nan mayornan. Riba 21 di sèptèmber lo tin e programa pa adulto na Landhuis Vredenberg ku presentashonnan di artistanan lokal i for di eksterior.
Asina ki el a nase
Nos a papia ku Joeri Oltheten inisiadó di e programa festival di Wintertuin aki a Kòrsou. El a konta kiko por spera otro luna, den e dos dianan di e festival. Joeri ta direktor di Wintertuin Kòrsou kende a splika ku nan a kuminsá na 2019 ku ta 5 aña pasa. E promé edishon tabata mei den Biblioteka na Skalo. Tambe tabatin un aktividat na Bar 27. Den tempu di Corona nan a sigui entre otro ku un edishon digital na Bloemhof na 2020, na 2021 nan a hasi un edishon chikitu na Blue Mall. Na 2022 a kuminsá ku un edishon na Landhuis Vredenberg i esun di mucha na Kids Museum. Aña pasa tambe esun di adulto tabata na lanthùis Vredenberg i di mucha a Museo di Kòrsou i e anja aki ta ripití e mesun kos ku anja pasa.
Kontribuí na desaroyo kultural
Joeri a konta nos ku e idea di e festival a lanta serka dje pasobra e tabata sinti falta di un festival o solamente pa literatura pero tambe kuenta den forma na Kòrsou i tur edat. Promé ku el a bin biba Kòrsou, el a tuma nota di e festival di Arte di Palabra ku a tuma lugá na un manera fenomenal i esei tabata pa hóbennan di skol sekundario. Tabata un kompetensia. El a sinti falta di festival ku ta duna podio na tur, e arte ku tin narativo den dje manera poesia, konta kuenta, rep, teater i asina el a kuminsá na 2019. Tambe nan a kuminsá ku kura di kuenta pero kier a kompartí nan eksperensia. E tempu ei a invitá artistanan di Ulanda ku huntu ku esnan di Kòrsou a realis’é. Kòrsou tin asina tantu talento segun Joeri ku te ainda nan no a ripití un artista. I te na ora mes un artista presentá pa di dos bia ta pasobra e ta hasi algu kompletamente otro. Tur aña nan presentashonnan ta kompletamente nobo. Esei tabata e intenshon di Wintertuin tambe esta kontribuí na e desaroyo di infrastruktura kultural di Kòrsou.
Mas presentashon di buki e aña aki
I no ta solamente presentashon tin den e festivalnan di Wintertuin, pero tambe nan ta duna kurso segun Joeri. Nan tin un trayektoria den esaki meskos ku nan ta guia eskritornan den publikashonnan i nan ta haña chèns di kompartí esaki ku públiko. Dos aña pasa nan a presentá e promé publikashonnan bou di Wintertuin ku ta di Ange Jesurun i Germaine Jong Loi. Nan dos tabata konosí kaba. Aña pasa nan a publiká buki di Aline Abdul i di Magali George. Magali tabata konosí pero no komo eskritor miéntras ku Aline tabata un kara nobo den nos paisahe kultural i el a presentá su promé buki di poesia. I e anja aki atrobe lo tin presentashon i publikashon di dos buki ku ta di Etienne Ys i Engelhardt.
Guia eskritornan
Na 2019 Wintertuin a kuminsá ku kursonan titulá Creative Writing Curacao. Ta trata di kursonan multilingwe kemen e partisipante por skibi na papiamentu, ulandes,s ingles òf spañó. I den esei a nota ku tin hopi idea pa publiká buki pero falta algu.I asina nan a kuminsá. Diferente di e partisipantenan tabata sigui kursonan i miéntras tantu nan ta sigui ku skibi teksto pa nan bukinan. I asina Wintertuin a bai over pa un trayektoria spesial pa e artistanan mas yòn ku yama basha pen. E partisipantenan aki ta yega na un tipo di buki ku no ta un publikashon grandi pero ta duna muestra di nan talento. I asina Aline a publiká su buki di poesia. Asina nan ta purba desaroyá e desaroyo dia arte di palabra i e ta pa e artista lokal pero pa e artista di afó tambe.
Nan tambe tei
Pa loke at e Kids Festival, Joeri a splika ku e no ta solamente pa e muchanan chiki pero nan mayornan tambe ta disfrutá. E ta un manera pa drenta den diferente forma di arte i esun narativo. Pa e loke ta e mucha e entretenimentu ta para sentral pero meskos ku esun ku pa adulto tin un tema su tras. E te,a e anja aki lo ta “Nan tambe tei”. Wintertuin segun Joeri ta para pa inklusividat, empatia, komprenshon i esei por mira tambe den e presentashonnan k tin programa.
Books Stage
Pa loke ta e festival pa adulto ku ta tuma lugá na Landhuis Vredenberg, Joeri a konta ku nan ta usa henter e tereno di e lanthùis. For di ora drenta na man drecha, kaminda e restorant tabata lo keda transformá den un podio Books Stage ku presentashonnan di entre otro buki di Ys i Engelhardt, tambe Richeline Joe ku ta outor lokal ku a partisipá den nan proyekto Transatlantic Relatives aña pasa ku tabata un interkambio literario ku Ghana. Richeline a representá Korosu na Ghana huntu ku Elvira Bonafacio.Richeline lo tin su promé buki di poesia. Einan tambe lo tin presentashon di Julien Ignacio ku ta un outor ulandes i el a gana premio di literatura masha prestigioso na Ulanda.
Ambiente stage
Mas aleu tin e ambiente stage ku ta mas un podio di presentashonnan di muzik i SpokenWords. Einan lo tin presentashon di un rèper Aldair ku su kansion nobo. Mas aleu lo tin presentashon di Frencel Sling ku tambe ta un poeta i e lo presente ku un Kor. Lo tin Mara Pastor un eskritor di puerto Rico ku ta na Kòrsou pa promé bia. Tin grupo Oriri pasobra semper ta rementá e festival ku muzik na final.
Mondi Stage
E di tres stage lo ta e mondi Stage ku ta unu bou di palu, ku eksperimentonan kreativo. Na e stage aki lo tin e Caribbean Cinepoetry ku presentashon di artistanan di reino lo presente den un tipo di pelíkula kòrtiku ku poesia aden. Tur pareha di poeta i lo tin presentashon di nan obranan. Einan por sinta i gosa trankil di e pelíkulanan bou di palu.
Presentashonnan
Mas aleu e programa lo konsistí di presentashon di un mucha muhé di Aruba Watra ku ta super talentoso ku ta skibi su mes letra. Tin presentashon spesial di Drazans ku ta un skol di teater di Kòrsou. Nan tabatin un presentashon resien over di nos relashon ku nos kabei i esei lo keda presentá na e festival tambe. Mas aleu for di Ulanda lo tin un plataforma ku yama Bijmekaar i ta un plataforma di improvisashon.E artistanan lo bin bek pa presentashon di entre otro poeta,bailadó ku músiko. Nan mes no sa kiko ta bai pasa. Dos di e integrantenan di e plataforma lo presentá riba nan mes. Ta trata di Sjaan Flikweert ku ta un spokenwords artista konosí di Amsterdam i Marc Alberto lo presentá. Mas aleu lo tin Danielle Boodoo Fortune di Trinidad tambe lo presentá. Ta trata di un poeta ku ta usa arte visual.
Obra teatral di Virtual Reality
Loke tambe lo presentá e anja aki den e festival ta un obra teatral di Virtual Reality. Ta trata di un grupo di Amsterdam ku ta forma pa dos hóben di Sürnam ku a traha nan obra ku yama History òf the World for di e perspektiva afro i por eksperensia esaki den Virtual Reality pero den grupo. Esaki ta algu nobo ku nunka a presentá na Kòrsou. I tin un eksposishon di arte digital di henter Caribe.
Programa di pa 11
E programa kompleto di e festival ta kuminsá 6 or di atardi i lo konta ku Dj Mitch i Manuela Rios i ofisialmente e programa lo terminá 11 or pero segun Joeri nan ta wak te kuant’or por bai. Nan eksperensia di aña pasa ta ku niun hende ke bai kas ora e aktividat terminá. I p’esei nan ke kuminsá na tempu pa asina tur artista por presentá. I dependé kon ta bai e anja aki kisas otro aña e festival pa adulto lo ta 2 dia.
Wintertuin den bachi krioyo
E festival di Wintertuin a bira un konsepto riba su mes ku awor no mester buska e artista pa presentá pero ta nan mes ta aserka e organisashon. Segun Joeri a konta nos nan mes tabata aserka e artistanan pero awor an a bira popular i nan ta keda aserka. Yunan di Kòrsou biba den eksterior ta aserka nan pa presentá. Manera tur hende sa, Wintertuin ta un organisashon eksistente na Ulanda ku ta hasi tur kos ku tin di aber ku literatura i ora Joeri a bin Kòrsou e kier a hasi algu paresido na Korsou pero den un bachi krioyo.
Hopi kreatividat
Tin hopi hóben ku talento i ambishon. Joeri a bisa ku nan a kuminsá ku Kura di Kuenta ku tabata un proyekto di eskritornan lokal ta guia e grandinan pa dokumentá nan historia. Nan a kuminsá ku diferente eskritor i boluntarionan ku despues a bai den Creative Writing. Asina a krea un ekosistema. Nan a krea un netwerk grandi i si bo ta skibi na Kòrsou bo por yega mas leu ku bo talento tambe.Engelhards i Aline a presentá a papiamentu na Ulanda i a logra éksito. Joeri ta kere ku pa hopi tempu nos a balotá nos potensial. Ta henter sosiedat, e mama i e tata, dosente di skol, amigunan ta konta pa enkurashá e hóben den arte. E posibilidat pa logra algu ta kuminsá na bo mes konvikshon. I awor aki si mira muchanan di for di 17 aña ku ta kuminsá ku publikashon ta inspirá otronan tambe. Na Albert Schweitzer por ehèmpel e festival a bira parti di un les brief di esnan ku ta bai pasa èksamen, E ta bira parti di e kuríkulo eskolar kuríkulo kaminda e hóben tin di bai pa hasi su anotashonnan i skibi na evaluashon. Joeri ta konvensí ku nos tur ta nase ku hopi kreatividat i ku tempu esei ta bai pèrdí pasobra nos no ta stimul’é i apresi’é mas tantu.
Programa pa mucha
Pa loke ta e festival di mucha, e tambe a kuminsá na 2019 i 2020 ku un obra i for di 2021 el a bira festival pa mucha.Lo tin aktividatnan riba un podio prinsipal ku presentashon kontinuo manera shou di baile di Excel Academy, Angelitos, Dj, Mudizu ku ta e promé muzik di zumbi di adolesente.I den e kura di museo tin yen aktividat manera e muchanan lo traha un slinger gigante.Lo tin un kareda di relevo huntu ku klup Trupial. Lo tin tayer di Song Writing pa e muchanan mes skibi ku Dibo Doran. E tema di Nan tambe tei e mucha lo bai pinta otro i skibi di otro. Tin akrobasia den kura di museo. Den e museo mes tambe tin aktividat. Ta kuminsá 4 or di atardi te 8 or di anochi.
