WILLEMSTAD.- E di 14 edishon di e akshon nashonal di limpiesa di mas grandi riba nos isla, World Clean Up Day Kòrsou, tabata un éksito atrobe. E akshon mas grandi di e kampaña di konsientisashon di Green Wave di Curaçao Clean Up, ku su meta ta pa keda konsientisá pa mantené nos isla limpi.
DANKI na tur boluntario ku a registrá sea komo organisashon/kompania o individual i spònsernan ku a kontribuí, pa e dia aki tabata posibel atrobe.
Komo 200 pais a partisipá na e akshon boluntario mas grandi di mundu i ta huntu ku 50 mion hende mas nos a hasi esaki.
Kick-off ofisial na Skol Broeder Rigobertus E kick-off ofisial di e aña aki tabata na Skol Broeder Rigobertus na Sta.Rosa. E direktora di e skol a duna un diskurso hopi bunita i inspirativo pa despues huntu ku direktiva di Curaçao Clean Up a hasi e konteo ofisial. Banda di nos presidente sra. Myrthe George, vários alumno a tuma e palabra espontáneamente, loke a hasi e momento hopi speshal.
E enfoke e aña aki ta prinsipalmente riba ‘zwerfvuil’ (shushi ku ta bula o ku ta tira riba kaya), ta pone ku e kantidat di kilo lo ta ménos ku otro añanan.
Fundashon Curaçao Clean Up ta hopi satisfecho kon e maintanan di limpiesa a bai rònt Kòrsou. Hopi grupo a preferá di kuminsá for di 6’or di mainta, p’asina tabata kla mas tempran. E aña aki a bolbe duna oportunidat pa hasi limpiesa riba e djabièrnè, 18 di sèptèmber i djasabra 19 di sèptèmber ku un total di 2400 boluntario na 125 lokashon diferente parti di Kòrsou. 11 kompania di ekipo pisá a yuda na tur e lokashonnan ku e pikimentu di shushi ku ta difísil pa kue ku man. Un kantidat di 155 sambuyadó ku a piki entre otro bastante liña di piska, kashi di bala, kuchú hulandes, bateria di outo na19 lokashon den laman.
E organisashon ta hopi kontentu ku Radulphus College, The Green Wavers, a traha huntu ku Kunukuman pa spar pa un 3D printer i ta demostrá atrobe ku traha huntu ta e yabi.
Debí ku den área di Ronde Klip a tira 3 kadaver di porko, ku Selikor a deshasí di nan mesora, lo mester limpia ku ‘grijper’ i ‘loader’ den e área aki te ku djamars próksimo. Esaki tin komo konsekuensia ku ta den transkurso di siman aki, lo tin e kantidat di kilonan definitivo di tur 2 dia.
DANKI na e kantidat grandi di boluntario, for di mucha te ku hende grandi (esun di mas edat ta di 88 aña), hopi motivá, di instansia, bario, grupo sosial i deportivo, skol i individualnan ku hopi alegria i energia, e aña aki atrobe a hasi limpiesa tantu riba tera komo den laman. Tur a partisipá ku hopi amor pa hasi nos isla mas limpi. Tambe nos kordinadónan di área ku a hasi un tremendo trabou!
DANKI na komersio ku a respondé riba nos yamada. Tambe na tur kompania di ekipo pisá ku a duna un tremendo kontribushon riba e dia aki.
DANKI spesial na PRENSA pa e koperashon di semper.
Fundashon Curaçao Clean Up ta spera ku despues di e wikènt di limpiesa aki, nos hendenan lo sa pa mantené Kòrsou limpi. Un isla limpi ta na bienestar di nos salú i nos ekonomia.
Kòrsou ta di nos tur i ta nos tur tin ku mantené limpi i sigui tene nos wowo habrí pa kada sushi ku nos mira rònt di nos i sigui tuma akshon, huntu ku famia, bisiña o kolega.
Curaçao Clean Up ta sigui promové Green Wave pa huntu nos por logra un isla limpi i sigui konsientisá otro pakiko nos mester biba riba un isla limpi.
Riba e kombinashon di potrètnan un bista di algun di e áreanan i di algun boluntario ku a tuma parti na e wikènt di limpiesa
Tim Renaissance
