Presidente ruso Vladimir Putin ta risibí e presidente di Repúblika di Kongo, Denis Sassou Nguesso, na Kremlin.
MOSKU, Rusia (AFP).- E presidente chines, Xi Jinping, i e brasilero, Luiz Inácio Lula da Silva, ayera a yega Mòsku pa e 80 aniversario dje viktoria kontra di Alemania nazi, i a probechá dje bishita pa reuní ku Vladimir Putin. E mesun kos a tuma lugá ku yegada dje venezolano Nicolas Maduro i e cubano Miguel Diaz-Canel.
Djabiernè awor, Plasa Korá di Mosku lo ta esenario di un gran desfile militar na kua lo asistí den kareda di trinta mandatario.
Putin a reuní ayera ku Maduro, ku kende el a firma un “tratado di asosiashon stratégiko” pa 10 aña. Mas despues el a papia ku Diaz-Canel, ku kende el a reafirmá ku e “union” dje isla ku Rusia lo permití nan enfrentá desafionan aktual i den futuro.
Djabièrnè e enkuentro ku Lula lo ta un “oportunidat pa un kòmbersashon” riba Ukrania, despues dje intentonan sin resultado dje mandatario brasilero pa promové un plan alternativa di pas huntu ku China, segun diplomátikonan brasilero a bisa.
E dirigente chines tambe lo toka e tema di konflikto di Ukrania i e relashonnan ku Merka djaweps, den un otro reunion bilateral ku Putin.
E sita ta tuma lugá na un momento ku aparentemente kosnan a pega den e esfuersonan pa kaba ku e guera den Ukrania i den un pleno guera komersial entre Beijing i Washington.
E hefe di Kremlin a rechasá un periodo di pas di 30 dia proponé pa Kiev, i na su turno a anunsiá di forma unilateral pa stòp ku atakenan di djaweps pa djasabra, loke Ukrania no a aseptá.
E asesor diplomátiko di Kremlin, Yuri Ushakov, a indiká na periodistanan ku Xi i Putin lo adoptá dos deklarashon konhunto, unu riba relashonnan bilateral i otro riba “stabilidat stratégiko mundial”.
Mas ku shen sòldá chines djabièrnè lo partisipá den e desfile militar, apesar ku Ukrania a atvertí di lo mira tur partisipashon estranhero komo “un apoyo na e estado agresor ruso”.
Presidente venezolano, Nicolas Maduro, na Kremlin huntu ku presidente ruso, Vladimir Putin.
