Presidente norteamerikano Donald Trump (r) i e presidente di China, Xi Jinping, ta saludá otro na e “Great Hall of the People” na Beijing.
BEIJING, China (AFP).- E presidente chines Xi Jinping, ayera a atvertí Donald Trump, ku un movishon no adekuá relashoná ku Taiwan, por hiba e dos paisnan den un “konflikto”. Esaki el a hasi den un mensahe bon kla durante e kumbre na Beijing. Xi a risibí e magnate merikano, dunando otro man, na pia dje monumento “Great Hall of the People” na Plaza Tiananmen, e sentro di poder komunista den e kapital, dekorá ku tapeit kòrá i kolónan di China i Merka.
Trump a kuminsá e enkuentro kara-kara elogiando su anfitrion, ku el a kalifiká komo “gran lider” i “amigu”, na momento ku el a pronostiká ku e dos paisnan lo tin “un futuro fantástiko huntu ku otro”. Pero mas ayá ke “show” inisial, Xi a usa un tono mas dirèkt ora ku el a bisa ku e dos paisnan “mester ta sosio di otro i no rival” i a referí na Taiwan, un isla outónomo di régimen demokrátiko ku Beijin ta reklamá komo parti di su teritorio.
“E kuestion di Taiwan ta e tema mas importante den e relashonnan entre China i Merka”, Xi a bisa, segun medionan estatal chines “Si manehá esei di forma robes, e dos nashonnan lo por dal kontra di otro òf inkluso drenta un konflikto, loke por hiba e relashon entre China i Merka den un situashon hopi peligroso”, segun e presidente chines a agregá.
E biahe di Trump pa Beijin ta e promé di un presidente norteamerikano den kasi un dékada i e gran resepshon ta kontrario na un seri di tenshon komersial i geopolítiko entre e dos ekonomianan mas grandi na mundu.
