BEIJIN, CHINA (AFP).- E presidente chines, Xi Jinping, ta pidi pa “di forma inmediato” stòp ku e guera entre Israel i Hamas i pa “liberá tur e detenidonan sivil”. El a hasi e yamada ei durante di un kumbre ekstraordinario virtual dje paisnan di BRICS.

“Tur esnan envolví den e guera mester stòp nan atake awor dirèkt,  pone fin na tur violensia i atakenan kontra di sivilnan, tambe liberá e detenidonan sivil pa evitá mas pèrdida di bida humano i mas sufrimentu”, segun Xi a trese dilanti.

E mandatario chines tambe a proponé pa organisá mas lihé posibel un “konferensia internashonal pa pas” pa trata di resolvé e konflikto. “No por tin pas ni seguridat duradero den Medio Oriente sin un solushon hustu pa e asuntu di Palestina”, Xi a deklará. E konferensia lo permití pa “traha pa yega na un solushon rápido riba e asuntu di Palestina, ku ta global, hustu i duradero”, el a agregá.

E presidente di China a sigui bisa ku “for di momento  ku e konflikto israelí-palestino a kuminsá, China a traha aktivamente pa promové negosiashonnan di pas i stòp e bombardeo”.

Beijin ta dunando yudansa humanitario na Gaza “i lo sigui hasi esei”, segun el a duna di konosé

Suráfrika djaluna a anunsiá e reunion ekstraordinario aki di BRICS (China, Brasil, Rusia, India i Suramérika), ku ta boga pa un  ekilibrio mundial, ménos influensia di parti di Merka i Union Europeo.

Histórikamente, China semper tabata faborabel na palestinonan i a apoyá e solushon di dos estado.

Su presensia den Medio Oriente a bin ta oumentá e último añanan, i Beijin ta purba na media den konfliktonan regional.

 

LAGA UN KOMENTARIO

Please enter your comment!
Please enter your name here