LONDON, AP.- Desde djárason David Cameron no ta promé minister di Gran Bretaña mas.
El a bandoná su ofisina i su kas na 10 di Downing Street i a presentá su renunsia algu despues na e palasio di Buckingham.
Theresa May a kombertí den e lider britániko nobo despues di a aseptá e invitashon di Reina Elizabeth II pa goberná. E palasio a konfirmá den un komunikado ku ” e honorabel parlamentario David Cameron tabata tin un reunion ku e Reina djárason atardi i a presentá su renunsia komo promé minister i esun enkargá ku finansa. Su mahestat a aseptá esaki ku grasia”. Algu despues palasio a publiká un pòtrèt di May saludando e monarka den palasio. Manera tradishonnan ta establesé pa kambio di gobièrnu na Gran Bretaña, Cameron a reuní ku Reina i a rekomendá May komo su susesor pa lider di Partido Konservador, e próksimo hefe di gobièrnu.
Despues di un ora May a kuminsá nombra su gabinete i vários puesto tabata pa partidarionan ku a vota pa Gran Bretaña sali for di Union Oropeo.