Awe atardi 3’or
WILLEMSTAD.- Konsehero sindikal, Wim van Lamoen ta hasi un yamada riba tur ámtenar i tur penshonado pa nan ta presente awe djaweps 12 sèptèmber den kareda di 3’or di atardi na Ansighstraat. Esaki relashoná ku e reunion ku tin awe den e plataforma di konsulta GOA i ku ta planiá pa kuminsá 2’or di mèrdia.
Ta trata di un reunion ekstraordinario pa atendé e proposishon pa eliminá e lei pa kòrta ku 12,5 porshento den kondishon laboral di ámtenarnan. Parlamento na 2020 a pasa e lei aki komo kondishon pa gobièrnu risibí sosten di likides for di Hulanda debí na e krísis finansiero i ekonómiko okashoná pa e pandemia di Covid-19.
“Awor ta e momento pa ámtenarnan i penshonadonan Sali i lucha pa nan derecho. Nan no tin nada di pèrdè i no mester tin miedu. Si penshonadonan por a bai para na bòshi den rei pa firma un petishon pa algu fantasma, nan mester sali awor tambe pa un derecho ku nan tin kaminda por logra algu konkreto”, Van Lamoen ta bisa.
Na 2022 gobièrnu a kuminsá drei e medidanan di e lei bèk i a duna ámtenarnan nan dianan di fakansi i pago di plaka di fakansi. Alabes a inisiá negosiashonnan pa eliminá e sobra medidanan di e lei ku ta e indeksashon di salario i pago di “loontrede” òf 3 porshento lumpsum pa esnan ku ta na nan salario máksimo ku ta konhelá. Esaki mester sosodé pa medio di un lei ku parlamento tin ku aprobá
Despues di mas ku 2 aña deliberá ku gobièrnu, dia 10 di sèptèmber último porfin e sindikatonan a haña e proposishon di lei den konsepto serka minister di Maneho di Gobernashon, Planifikashon i Servisio Públiko, Shalten Hato. For di e dokumento aki ta konkluí ku ke eliminá e medidanan den e lei ku forsa retroaktivio te promé di yanüari 2024.
Presidente di di sindikato SAP, Amado Vilchez ta bisa ku djárason 11 sèptèmber e 5 sindikatonan ku ta representá den GOA a reuní na sede di sindikato PWFC pa prepará pa e reunion di awe. A palabrá ku ta bai skucha e splikashon di gobièrnu riba nan proposishon, pero ku te asina leu ku por a kontrolá e proposishon aprobá pa Konseho di Minister ku konseptonan anterior, no tin niun kambio
Esaki ta algu insólito segun Vilchez meskos ku ta insólito ku tin 2 aña den negosiashon ku gobièrnu riba eliminashon di e lei di 12,5 porshento i ku ta proponé pa hasi esaki ku forsa retroaktivo te promé yanüari 2024. Sindikatonan ke bai bèk te promé yanüari 2023 pa asina ámtenarnan por kuminsá kobra indeksashon di salario for di 2023 i penshonadonan tambe por haña indeksashon di penshun di aña 2023.
Van Lamoen ta bisa finalmente ku miéntras a eliminá e medida pa kòrta ku 12,5 porshento den salario di parlamentario i ministernan, ainda ámtenarnan su indeksashon salarial i derecho riba “loontrede” òf lumpsum ta konhelá. “Kosto di bida a subi barbaramente, ámtenarnan i penshonadonan su entrada a keda para na e mesun nivel i awor no ke duna nan nada tampoko.”
