JOAQUIN GUZMAN LOPEZ
CHICAGO (AFP).- Joaquin Guzman Lopez, un dje yunan dje konosido narkotrafikante mehikano, Joaquin “El Chapo” Guzman, a deklará su mes kulpabel di akusashonnan di tráfiko di droga i a hasi esaki dilanti di un tribunal na Merka, algun luna despues ku su ruman Ovidio tambe a yega na un akuerdo hudisial similar.
E akusado a komparesé dilanti di un tribunal federal di Chicago den oranan trempan di ayera tardi i a kambia su deklarashon anterior den e kaso, segun Chicago Tribune. Despues di su detenshon na Texas den yüli di 2024, Guzman Lopez a nenga di ta kulpabel di trafikashon di droga, labamentu di plaka i uso di armanan di kandela den seno di e kartel di Sinaloa. Hustisia norteamerikano a akus’é ku huntu ku su tres rumannan hòmber el a forma parti di e kartel konosí komo “Los Chapitos”. E grupo ei a tuma e aktividatnan di “Chapo”, kondená na bida largu na Merka den 2019.
Polis a detené Guzman Lopez (39) despues di a biaha den un avioneta na Texas huntu ku e ko-fundadó dje kartel, Ismael “El Mayo” Zambada.
Deklarando su mes kulpabel, Guzman Lopez a konfirmá pa promé biaha ku el a gaña Zambada pa por a sekuestr’é, bisando ku e tabatin mester di su yudansa pa resolvé un disputa, di akuerdo ku Chicago Tribune.
E yu di “Chapo” a atmití den su deklarashon komo kulpabel di a “sekuestrá” Zambada, e tempu ei un dje hòmbernan mas buská na mundu, “ku e speransa” di haña pordon serka gobièrnu di Merka, segun e korant a publiká. Merka a nenga di a tuma parti den e plan pa hiba Zambada riba su teritorio. Pero e fiskal federal athunto Andrew Erskine a señalá ku, a kambio di kooperashon kontinuo di Guzman Lopez, e fiskalnan lo rekomendá un kastigu mas abou kompará ku bida largu, di akuerdo ku e publikashon.
Su ruman, Ovidio Guzman Lopez, detené sin derechi di fiansa despues di su ekstradishon di Méhiko pa Merka den 2023, na New York a deklará su mes kulpabel di akusashonnan similar.
Despues dje aresto di Zambada (77), i di Guzman Lopez, a multipliká e enfrentamentunan entre “Los Chapitos” i e grupo dje veterano kapo pa e kontròl di e kartel di Sinaloa. E guera interno a laga den kareda di 1.200 morto na Méhiko i alrededor di 1.400 hende di kua no sa nan paradero.
Washington ta akusá e kartel di Sinaloa di a introdusí fentanilo na Merka, kaminda e droga akí a provoká desena di míles di morto den último añanan.
