RIO DE JANEIRO (AFP).- E senador brasilero Flavio Bolsonaro, yu dje eks-presidente ultraderechista Jair Bolsonaro, ayera a sugirí pa Merka bombardiá barkunan den Rio de Janeiro pa kombatí narkotráfiko, manera nan a hasi den Karibe i den Pasífiko. E gobièrnu di Donald Trump ta konta ku un flota di ‘destroyers’ (USB-1B Bomber), un supmarino i barkunan di guera den laman di Karibe ku e argumento di impedí e yegada di droga pa via marítimo na su pais.
For di 2 di sèptèmber Merka a realisá un seri di atake riba e loke nan ta referí komo lanchanan narkoterorista. Forsanan militar te ku ayera realisá nuebe atake riba lanchanan den último simannan, ku un saldo di 37 morto. “Est’un envidia. Nos a komprondé ku tin barkunan manera esakinan den Rio de Janeiro, den bahia di Guanabara, inundando Brasil ku droga. ”Bosnan lo no tin gana di pasa algun luna aki pa yuda kombatí e organisashonnan terorista?”, segun Flavio Bolsonaro a skibi riba X.
Su mensahe ta reakshon riba un publikashon dje hefe di Pentagon, Pete Hetseth, ku un video dje momento ku un lancha ta keda alkansá pa un misil lansá pa militarnan norteamerikano i a keda na vlam.
Presidente di Venezuela, Nicolas Maduro, i su kolega kolombiano, Gustavo Petro, ta denunsiá e operashonnan norteamerikano komo ehekushonnan sin desishon di korte komo tambe intento pa destabilisá e region.
