LA HABANA, Cuba (AFP).- Mariela Castro, yu di e eks presidente kubano Raúl Castro, no ta kere ku su tata, di 94 aña, lo keda sekuestrá di parti di Merka, despues ku hustisia dje pais ei a lansa un akusashon kontra di su persona. E ruman menor di defuntu Fidel Castro (1926-2016), enemigu grandi di Washington, djárason a keda akusá na Miami pa morto di kuater norteamerikano di kendenan dos avioneta a keda tumbá den 1996. Raúl Castro e tempu ei tabata minister di defensa.
“Ningun hende ta bai sekuestr’é, ni e ni ningun otro hende. Nos ta prepará pa bringa kontra di imperialismo”, segun Mariela Castro, den e promé reakshon di un miembro di famia riba e akusashon penal. “Mi no tin miedu pa motibu ku nan no ta bai hasi e kos ei”, el a agregá durante di un manifestashon di sosten na su tata, organisá dilanti dje embahada di Merka na La Habana.
E seksólogo di 63 aña, mas aleu a bisa di no a papia ku su tata riba e tema, “Pero ora ku el a skucha ku a menshoná algu, el a hari manera un gueriero veterano ku sa ku e ta sigur, esta ku pia riba tera ku ningun hende ta bai sekuestr’é”. Raúl Castro no ta okupá ningun funshon ofisial den e gobièrnu ni den Partido Komunista, pero ketu bai e tin un papel importante den desishonnan polítiko dje isla i tin lealtat di forsanan armá.
Pa loke ta trata e akusashon ofisial, Mariela Castro ta konsiderá ku “e proseso ei no ta posibel pasobra e ta violá tur loke a keda establesé na nivel legal na Merka, ounke ku “nan (e gobièrnu di Trump) a hasi tur loke nan ke i a violá Konstitushon”.
