OSLO, NORUEGA (AFP).- E yu mayor dje prensès heredero di Noruega Mette Marit, sospechoso di dos kaso di violashon, a drenta prizòn preventivo pa un siman, segun prensa noruego, dos dia despues di su aresto.
“Marius ta enfrentá akusashonnan grave ku tin ku keda investigá pa polis i hustisia”, segun e prens heredero dje trono noruego, Haakon, na televishon públiko NRK.
“Mi ta konvensí ku nan lo hasi un bon trabou”, segun el a bisa for di Jamaica, kaminda e ta ku fakansi.
Despues ku e prizòn preventivo a bira konosí, e abogado di Marius Borg Hoiby, Oyvind Bratlienm a deklará na NRK ku su rekurso kontra e desishon di tribunal lo keda skuchá awe. Bratlien a bisa di ta sinti su mes aliviá ku hues no a apliká e petishon di polis, ku a pidi dos siman di detenshon.
Marius Borg Høiby, di 27 aña, nasé di un relashon anterior di matrimonio di su mama den 2001 ku Haakon, a keda detené djaluna komo sospechoso di violashon.
Segun polis, durante dje investigashon a surgi un di dos sospecho di otro violashon.
Borg Hoiby dia 4 di ougùstùs tambe a keda arestá despues di un pleitu den un kas di un muhé den Oslo i akusá di a kousa leshonnan na e residente, ku kende e tabatin un relashon.
Despues di esei, den sèptèmber e ta keda arestá un biaha mas pa motibu di a violá un órden di protekshon.
Magnus, di 18 aña, a keda kriá huntu ku Mette Marit i Haakon. Kontrario na nan, e no tin un ròl ofisial.
