ROTTERDAM/WILLEMSTAD.- Ayera tabatin un drama den seno di famia “Antiano”, di Kòrsou na Hulanda. E krímen a sosodé den un flèt na Rotterdam-IJsselmonde. E víktima ta e hòmber kurasoleño E. Nisia.
T’asina ku brantwer i outoridatnan polisial a keda dirigí pa un edifisio di flèt na
Oosterse Tuin den Rotterdam-IJsselmonde, den anochi di djamars pa djárason. Abitantenan a mèldu ku den e kas lo tin kandela. Na promé bista a kere ku tabata den e lift dje edifisio tabatin kandela, pero ora a yega tabata den e flèt ku tabata na di seis (6) piso dje edifisio.
Na yegada di outoridatnan a topa un hòmber ku tabata malamente heridá i for di e momentu ei tabata teme pa su bida. Djis un ratu despues e hòmber víktima a fayesé.
Polis ta bisa ku ta trata di un insidente den esfera relashonal.
Den e kas a topa ku e hòmber víktima di 62 aña drumi den e kas den plas di sanger. No por a reanimá e víktima, mirando ku ya tabata lat.
Polis ta sali for di e punto di bista ku a base di e heridanan ku e víktima ta, ku lo ta trata di un krímen.
Djárason mainta a detené un hòmber di 27 aña di Rotterdam sospechoso di e kaso aki.
Segun informashon ku nos a optené ta ku e yu hòmber lo a hinka e tata di forma hopi grave, ku konsekuensia ku el a fayesé. Despues di esei a sende e flèt na kandela.
Riba retnan sosial por mira lamento sigur di famianan, ku ta indiká ku e víktima tabata un hende masha ketu i p’e fayesé di forma kruel asina.
Outoridatnan ta investigando e kaso aki ku ta un krímen den esfera familiar.

LAGA UN KOMENTARIO

Please enter your comment!
Please enter your name here