Luna di kolekta di Prinses Wilhemina Fonds a kuminsá e siman aki. Ta trata di un di e eventonan di mas grandi kaminda PWF ta rekoudá fondo pa e fundashon por kumpli ku loke e ta konsiderá su obligashonnan. Un di nan i esun mas prinsipal ta atendé ku pashèntnan ku kanser. I netamente den e kuadro aki e siman aki den djasabra nos tin tres pashènt ku kanser ku a konta nan eksperensia. Ta trata di Nicole Henrietta, Maite Zimmerman i Thelma Kroonstadt. Nan a keda asistí pa e trahadó sosial Richanaly Sprockel Martinuz.
Luna di sèptèmber ta luna di kolekta. For di 1e di sèptèmber tin buzonnan poné na diferente establesimentu pero tambe ta topa ku boluntarionan ku e buzon pará na porta di entre otro supermerkadonan. Banda di esei tambe por hasi donashonnan mensual na e fundashon.
Nicole Henrietta
“Mi tabatin kanser na un edat hopi yòn di 26 aña. Ora mi a bai dòkter, na Wit Gele Kruis ku tabata kuida mi herida a konsehá mi pa tuma kontakto ku Wilhelmina Fonds pa e sosten emoshonal. Promé mi no tabata interesá ètòl. Mi a pensa ku e kos ei no ta nada pa mi, ta yen hende bieu tin einan, e hendenan no ta komprondé kiko mi ta pasa aden tòg, niun hende por yuda mi i niun hende por kit’é fo’i mi tòg. Pero despues mi a pensa ku mi no mester ta ‘koppig’ asina aki. Mi a aseptá di aserká nan i mi no ta arepentí esei pasobra den diferente aktividat ku PWF ta ofresé pashèntnan komo sosten, mi a logra aseptá e situashon ku mi tabata aden na e momentu ei. Te ainda mi ta aseptá kambionan drástiko ku a bin den mi bida despues ku mi a haña kanser”, tabata palabranan di Nicole.
Difísil pa aseptá
Nicole a sigui splika ku den prinsipio ku a detektá kanser serka dje e tabata arogante ku asta su mes. E tabatin un aktitut komo sifuera e kos ei no por a pasa kuné, kon porta e ta den flor di su hubentut, e ta traha i gusta su trabou, e ta hasi su kosnan leuk i unda e kos ei a sali. Den un di e terapianan di Intuïtief Schilderen Nicole a bisa ku den e promé lès ku el a bai, el a yora un pa dos ora sin por a papia nada, te el a drenta su outo yora bai kas. Ta e momentu ei numa el a aseptá ku e kos aki di bèrdat e ta pasando. E ora ei kos ei a senk serka dje, e ora ei e kònòpi a drai den su kabes ku ta asina e kos ta. I esei a dal e duru. El a haña hopi sosten na PWF. Nicole a bisa ku el a pasa den tur su terapianan ku hopi sosten. E tabata asta haña bishita di trahadónan sosial asta ora e tabata interná den hospital. Kisas e por zona manera kos chikí pero esakinan a dun’é e push. “Hopi bia hendenan rondó di bo nan mes no sa kon pa dil ku e kos, i mi no sa di e otro personanan kon nan ta eksperensi’é pero den mi kaso, mi ta kere tabatin di aber ku mi edat ku el a dal mi hendenan duru. Hopi hende no ta hala atras pa malu pero nan no por a dil ku e kos. Bo ta sinti bu hopi bo so i e sosten ku bo ta haña ta yuda bu hopi pa para riba bo pia. E guia ku bo ta haña ta yuda bu pa komprondé i aseptá kiko ta pasando pa bo por sigui di un manera positivo ku bo bida”, Nicole a relatá na Djasabra.
Hopi kambio
Tambe el a bisa ku sin PWF e lo no a bin bei. E ta kere i asta por bisa ku kisas e lo a drei dor pasobra ta hopi kambio el a pasa aden. Normalmente Nicole no ta gusta pidi hende nada i esei tabata un di e kosnan di mas difísil esta siña pidi yudansa. Pero kosnan manera ora operá kanser na pechu, bo no mag di hisa kos pisá. Normal Nicole riba djasabra e ta lanta i chapi kurá i drecha mata pero direpente e no por mas. E mester a kambia outo, kambia wasmashin i hopi kambio. Si normal e ta lanta hasi 100 kos riba un dia, kisas awor ta 2 e por. Tin momentu e por frustra i yora i puntra dikon pero papiando ku otro personanan ku tambe a pasa dor di kasonan similar i tambe ku e profeshonalnan na PWF e ta siña di apresiá bida i di sigui ku loke bo tin.
Di pashènt pa boluntario
Den fakansi ku a pasa Nicole tabata un di e boluntarionan di e plan di fakansi di PWF pa muchanan ku sea nan mes tabata pashènt òf ta pashènt òf nan famia. Tabata algu masha bunita pa mira tòg kon e muchanan ta uni, sin importá edat, pa medio di un eksperensia ku ta basta zür pero un esfera masha great di union, hopi amor i rèspèt. PWF sa ku Nicole su base ta pedagógiko i e ta dispuesto na yuda ku tur loke e por. Semper el a gusta trabou boluntario i awor pasando den esaki e ta dediká mas tempu posibel komo boluntario na PWF pasobra e sa i el a mira kuantu nan a hasi pa e mes tambe.
Maite Zimmerman
Maite Zimmerman tabata otro pashènt ku kanser ku a konta su eksperensia ku PWF. Pe tabata lamentabel pa sa ku e tabatin kanser. PWF a nifiká hopi pa Maite. Ora el a sa ku e tin kanser, promé kos ku a bin na su kabes ta bai sinta un kaminda su so. Promé kos ku a bin su kabes ta dikon e. E ta un mama ku 5 yu, un mama soltero ku tin di wak pa su yunan kon e ta hasi pasobra si algu pas’é kiko lo pasa ku nan. Na hospital nan a konseh’é pa bishitá Prinses Wilhelmina Fonds ku tin bon guia i por yud’é. Asina el a yega na porta di PWF. Maite a bisa ku mesora nan a habri man i yud’é. El a haña trahadó sosial pa yud’é i no e so, pero tambe su yunan. E momentu ku el a haña sa ku e tin kanser e no tabata sa kiko e bisa su yunan, pa splika nan kua malesa e tin. Esei pasobra ora tende kanser bo ta pensa morto i p’esei e no tabata sa kon pa e splika su yunan di e problemanan ku e tin di bai pasa aden. PWF tin guia pa e muchanan. Nan tabata bai djabièrnè na e aktividat Prinses Wilhemina Fonds Kids. E muchanan a haña terapia kon pa dil ku nan mes i problemanan ku ta yega serka nan. Tin fakansiplan pa e muchanan miéntras ku Maite tabata pasa den su proseso ku tambe PWF a yud’é kuné. E tabata sintié bon pasobra e sa ku su yunan ta den bon man, e sa ku e muchanan lo siña kon dil ku e problema. Esei tabata un eksperensia ku Maite mas a gusta. El a pasa den tur tratamentu kaba, i awor e ta sperando su rekonstrukshon, loke e ta masha ansioso pe. E sa sigur ku tur kos lo bai bon.
Diferente terapia
Maite a bai diferente terapia manera pintamentu intituivo, lès di mosaik. Dream Catcher. Den tur e lèsnan ku ta terapia e ta siña e obranan. Por ehèmpel den esun di mosaik e ta siña kon traha un spik ku su mes ideanan i inspirashon. Maite a bisa ku e tipo di terapianan ei ta yuda sigur sigur pasobra no ta sinta konsentrá kiko bo ta bezig kuné i asina tur problema i strès ta wanta. E ta duna e posibilidat pa pensa kiko ta bai hasi despues. Maite ta un hende masha drùk mes; e tin 5 yu ku ta bai futbòl, baseball i yen kos mas. E ta asina drùk ku e no tin tempu ni pa e mes. I ora e bai PWF e tin un tiki tempu pa e dediká na su mes pa e pensa mas rustig.
No tabata mi falta pero dikon ami?
Relashoná ku e kanser el a bisa ku e no ta sinti ku ta su falta i tampoko sa kiko ta e motibu., El a bai sinta pa wak kiko tabata e posibilidat despues. E tin 5 yu i tur 5 a bebe pechu i ta bisa ku ora e muchanan bebe pechu e persona tin ménos chèns pa kanser di pechu, pero tòg esei a toke i pa kolmo na e pechu ku e muchanan mas tabata alimentá nan mes. E no por a komprondé, pero una bes e tei, no por hasi nada. Awor aki si a hasi algu i a kore kuné. Maite a bisa ku e sa ku e kos aki por pasa ku hopi hende. E ta interkambiá ku hopi hende ku e no por imaginá su mes ku nan tin e kos aki. Ora tin e gruponan pa kombersá òf ora nan tin aktividatnan nan ta enkurashá otro pasobra tin hende no por siña dil ku e problema. Nan ku ta hóben ta enkurashá otro. “Tin hopi kos bunita nos dilanti. Di tur e kosnan mahos ku tin, por saka e kos bunita di dje. Bo ta siña konosé hende, siña konosé bo mes, siña konosé ken ta bon ku bo pasobra esei tambe tin. Hopi hende sin ku nan ke ta bai i no sa pa kiko pero abo ta mira ki tipo di hende bo tabatin serka bo na e momentu ei”, Maite a bisa.
Yuda otro
Maite a bisa ku aña pasá el a eksperensiá kolekta i a bai hopi bon. Ounke tabatin covid nan a para algun kaminda i hopi hende a kooperá. E ke enkurashá mas hende posibel pa yuda pasobra bo no sa ki dia ta toka abo mes òf ki dia ta toka un famia di bo i sigur PWF ta hasiendo hopi bon uso di e sèn pasobra e ta yudando hopi hende ku realmente mester di nan. E eksperensia ku el a pasa aden kaba i ku e ta pasando aden ainda i e lo sigui yuda e tambe tipo di aktividatnan pasobra el a hasi bon kambio den mi mes bida. Gustosamente si tin mas hende ku ta duna kolektá pa yuda otro hende lo ta hopi great.
Thelma Kroonstadt
Thelma ta otro pashènt ku kanser i ku a konta su eksperensia ku Prinses Wilhelmina Fonds. Thelma a kuminsá ku yama danki na kreador ku a permití pa e ta einan i danki na PWF ku a sostené den henter e trayekto di kanser. E momentu ku el a haña sa ku e tin kanser tabata manera un laman pa hala bo bai ku bo i keda bai ku bo. Thelma a bisa ku promé e tabata su so pero na hospital ora el a puntra dòkter si tin un kaminda ku e por bai òf un banko di informashon òf buki òf hende ku e por papia kuné. Su dòkter a konseh’é pa PWF i mesora el a akudí serka nan. “Mi no por gaña, mi konosé tur e tres trahadónan sosial di aserka. Mi a pasa den tur tres su man. Nan tur tres a trata mi masha bon mes. I nan a guia mi, mi a siña hopi ku mi por a pasa dor di por ehèmpel e “chemo”, sin transpòrt i den solo kayente. E chemo ta hopi duru.” Thelma no a pasa tur su chemonan pasobra su kurpa no a resistí tur, pero e ta yama Dios danki i ta konfia ku no tin nada mas. E ta konta ku el a pasa radiologia den sustu pasobra ta nèt ku covid a kuminsá, tur hende boka tapá i yen miedu di mishi ku asta porta. E ta kòrda tur hende tabata bisa pa kuida pasobra su resistensia tabata hopi abou. Pero el a pasa dor di dje tambe. Mas aleu sra. Thelma a mustra riba e komementu i kiko e mester a kome. El a desesperá pa kiko e tin di kome siendo e no tabatin trabou figo. Pero e ta yama danki na PWF pa esei tambe.
Kontrolá i no tene miedu
P’esei e ke konsientisá hende hòmber i hende muhé, hóbennan tambe pa kontrolá na dòkter. E asuntu di pechu i kanser di prostat, di stoma tur ta nesesario pa kontrolá. I no tene miedu di PWF. Antes e ta kòrda ku e ta pasa dilanti ofisina di PWF i pensa ku e lugá ei no ta pe i nunka e lo trapa su pia einan. E momentu ku el a hañ’é ta trapa einan, e tin di bisa ku e ta kontentu ku el a konosé nan i e trato ku el a haña.
“E karga a baha di mi lomba”
Tambe Thelma a bisa ku e dushi di PWF ta e atardi djárason un bia pa luna ku hende muhé i hende hòmbernan den e sala ei ku nan por konta kiko nan a pasa aden. Kada un ta siña di otro i nan sa ku tur kos ta keda eiden. Tin un sikólogo ta bin einan i ta yuda nan asina bon. Ora e sali djárason di einan, ta manera un karga a baha di su lomba. Thelma a hasi un petishon dramátiko pa e luna aki duna na PWF. Djis pensa ku ora bo duna bo ta haña bèk.
Richanaly Sprockel Martinuz
Richanaly ta trahadó sosial na Prinses Wilhelmina Fonds. E ta konta ku nan tin un tim di 3 trahadó sosial ku e tambe ta forma parti di dje huntu ku Alejandra Wieske, Lusmarina Profar. Na momentu ku e kliente keda di mèldu serka nan, nan ta hasi “intake” pa mira kiko ta e yudansa. Semper den e plan di yudansa ta deliberá ku otro i asina nan no ta sinti e preshon, e peso di e trabou pasobra nan tres ta sostené otro. Richanaly ta trahando na PWF pa 7 aña kaba. Ta hopi persona a pasa serka dje i kada un ta diferente. E klientenan den kondishon ta bai nan ofisina miéntras esnan malu nan ta bai kas serka nan i tambe ta bai hospital serka nan. Nan tin nan ofisina na hospital kaminda nan ta sinta i ta sera konosí ku klientenan nobo. Pero tambe ta bishita klientenan konosí kaba. Tambe nan tin bon relashon ku e Hospice nan. Den nan trabou nan ta atendé ku hende muhé, hende hòmber i diferente edat. I tambe muchanan ku kanser ta riba nan lista pa atendé kuné.
Kada kaso ta diferente
Ora ta papia di hende muhé i hende hòmber, Richanaly a bisa ku ora un persona disidí di bai PWF ta nifiká ku el a aseptá ku e tin e malesa i ku e ke guia. Pa nan komo trahadó sosial ta mas fásil pa dil kuné pasobra e ta habri kaba i a skohe ku e ke guia. I p’esei nan ta haña tur ta mesun fásil pa atendé kuné. Tin ora si un hende ta na hospital i a tende di e malesa i a tende di e fundashon pero e no a kaba di disidí kon e ta bai atendé ku e situashon i no ta skohe mesora pa bira miembro. Asina e persona disidí di bira miembro, niun kaso mas ta difísil. Sinembargo kada un ta diferente, kada hende tin nan petishon pa yudansa, kada kos ta otro. Loke ta krea serka e kliente ta e parti di konfiansa i p’esei ta pidié kliente pa puntra puntra i puntra. Tur siman segun Richanaly nan tin kliente nobo i p’esei nan ke pa e kliente papia i splika kiko e ke komo yudansa.
