CARACAS, AP.- Funshonarionan di Merka a bisa ku e promé trùknan ku kuminda i remedi destiná pa Venezuela a yega Colombia.
E direktor di Agensia pa desaroyo Internashonal di Merka, Mark Green, a tweet djárason ku yudansa humanitario ta kla pa krusa frontera mas pronto ku ta posibel.
El a publiká potrèt di e suministronan empaketá i kargá den trùknan. E lider opositor venezolano i alabes presidente interino di Venezuela, Juan Guaidó, a pidi e yudansa internashonal, i presidente Nicolás Maduro, ta rechasá esaki konsiderando e akto aki komo un golpe di Estado promové pa Merka.
Ehérsito di Venezuela, kual ta leal na presidente Maduro, a blòkia e brùg entre Venezuela i e siudat na frontera kolombiano di Cucuta, kual ta un posibel punto kaminda ta hinka e produktonan den Venezuela.
Kansier kolombiano a informá den un komunikado ku Unidat Nashonal, Gerensia na Frontera, Ministerio di Relashon Eksterior i Migrashon di Colombia tin e logístika nesesario kla pará pa risibí e promé entrega di yudansa humanitario pa Venezuela.
E sekretario di Estado merikano, Mike Pompeo a pidi e gobièrnu di Nicolás Maduro, pa laga e yudansa humanitario yega na e pueblo di Venezuela.
E kansier kolombiano Carlos Holmes Trujillo a indiká ku Colombia lo kometé un krímen si e pais ninga di laga e yudansa humanitario destiná pa Venezuela, drenta via Colombia.
Maduro i tribunal Supremo di Hustisia a rechasá e yudansa indikando ku no tin un situashon di emergensia den Venezuela.
Kas Blanku a anunsiá ku presidente Donald Trump lo risibí e mandatario kolombiano Ivan Duque riba 13 di febrüari i ámbos lo papia tokante restourashon di demokrasia na Venezuela, kombate di terorismo i narkotráfiko entre otro temanan.
