WILLEMSTAD.- Yunan di Kòrsou a inisiá selebrashon di Siman di Kultura na Rotterdam. Sra. Vanny Hooi pa promé biaha ta organisá Siman di Kultura na Rotterdam, Hulanda. A start e dia aki ku un tayer di Kaha di Orgel. Tabatin demostrashon i a siña hendenan baila e Kaha di Orgel. E dia tabata un éksito total. Sra. Hooi a splika ku a kuminsá e atardi ku lèter i chukulati manera tabata haña ántes na fiesta di boutismo, kasamentu i risibimentu.
E ta haña ku ta hopi importante pa keda selebrá e tipo di eventonan aki na Hulanda. E akohida i interes ta bira dia pa dia mas tantu pe selebrashon aki. Lo tin klousura di Siman di Kultura djadumingu awor 6 di òktober na Den Bosch. Tambe a kombersá ku Sr. Rodwin Balootje presente na e dia aki a splika di fiesta di Kaha di Orgel ku su mayornan tabata tene na Tera Kòrá. El a splika dje tradishon di fiesta di Kaha di Orgel. Komo mucha el a lanta i mira e tipo di fiesta aki. No tin hopi fiesta di Kaha di Orgel manera ántes pues bailadónan tampoko lo no tin hopi. Apesar di a lanta den kultura ku kustumber di Kaha di Orgel, sr. Balootje mes no tabata organisá fiesta di Kaha di Orgel. Tambe nos a papia ku sr. Marfrensel Osepa i sr. Gabriel Simon. Sr. Marfrensel ta toka e Kaha di Orgel i ta doño di esaki. Marfrensel a splika di historia di e Kaha di Orgel, miéntras sr. Gabriel a splika funshon dje wiri banda di e Kaha di Orgel.
