KIEV, Ukrania (AFP).- E presidente ukraniano, Volodimir Zelenski, ayera a anunsiá ku “probablemente djadumingu” lo e reuní ku e papa nobo, Leon XIV, pero ku esei lo dependé si tin kambio riba nivel diplomátiko ku Rusia.
“Probablemente djadumingu. “Pero nos no sa ainda kon siman lo kaba”, segun Zelenski den un entrevista, dos dia promé ku nan kuminsá na Turkia ku e promé kòmbersashonnan entre Rusia i Ukrania den mas ku tres aña.
“Nos a yega na un punto ku nos no sa kiko lo pasa mañan”, el a agregá.
Leon XIV tin programá pa ofisialisá su misa inougural djadumingu awor riba Plasa di San Pedro di Vatikano i ta spera ku hopi dirigente estranhero lo asistí.
Promé ku esei, Zelenski a proponé na Putin pa nan reuní djaweps “personalmente” na Turkia, pa un kòmbersashon kara kara ku e fin pa yega na un salida pa e konflikto.
E último biaha ku tabatin negoshashon bilateral tabata den primavera di 2022, algun siman promé ku e invashon ruso a kuminsá.
Te ku ayera nochi Kremlin no a reakshoná riba e proposishon dje presidente ukraniano ni tampoko presisá ken lo ta den e delegashon ku lo e manda Turkia.
