KIEV, UKRAINA, AFP.- Presidente ukraniano Volodimir Zelenski a yega Merka ayera pa asistí na e asamblea general di ONU i despues e tin entrevista ku su homólogo merikano Joe Biden na Washington.
“Olena Zelenski i ami a yega Merka”, asina e presidente ukraniano a bisa riba X (ántes Twitter) refiriendo na su kasá, pa realisá enkuentronan na ONU New York promé ku e biaha pa Washington.
“Lo mi asistí na asamblea general, e kumbre riba ophetivonan di desaroyo sostenibel ODS, e reunionnan di konseho di seguridat ONU, i vários enkuentro bilateral importante”.
Ta spera ku Zelenski lo duna un diskurso den asamblea general awe djamars. “Ukrania lo presentá un proposishon konkreto na e miembronan di ONU riba kon fortifiká e prinsipio di integridat teritorial i mehorá e kapasidat di ONU pa prevení i detené e agreshon”, asina el a señalá.
Zelenski a bisa ku e ta kuminsá su bishita na Merka bishitando sòldánan ukraniano ku ta den tratamentu i rehabilitashon na e pais. E presidente ukraniano lo bai despues Washington pa e papia ku Biden i lidernan di kongreso merikano i e partidonan, outoridatnan militar, empresarionan, periodistanan i miembronan di komunidat ukraniano, asina el a terminá.
