KIEV, Ukrania (AFP).- E presidente ukraniano, Volodimir Zelenski, ayera a duna di konosé di ta dispuesto pa reuní “personalmente” ku e presidente ruso, Vladimir Putin, na Istanbul, despues ku Merka a mustra riba e nesesidat pa por tin kòmbersashon dirèkt. E kòmbersashon akí ta pa determiná e posibilidat di akuerdo di pas.
Mosku i Kiev no a mantené kòmbersashon dirèkt for di mart di 2022, poko despues dje invashon ruso di Ukrania, ku ya a laga míles di morto i a permití pa Rusia tuma kasi 20% di e teritorio ukraniano.
“Nos ta spera un stòp total i duradero dje atakenan, kuminsando mañan (awe djaluna), ku ta duna un base nesesario pa e parti di diplomasia”, segun Zelenski a skirbi riba X.
“No tin sentido pa prolongá e masakrenan. Mi ta spera Putin djaweps na Turkia… personalmente. Mi ta spera ku e biaha’ki e rusonan no ta buska esküs”, el a agregá.
E mandatario ukraniano poko promé a bisa di ta dispuesto pa reuní ku Rusia dia 15 di mei na Istanbul, pero a pone komo kondishon ku Mosku mester komprometé su mes na un periodo di 30 dia sin guera, kuminsando awe.
Kremlin no a reakshoná di forma inmediato i Zelenski no a presisá si lo e t;ei na e sita den kaso ku Mosku rechasá e proposishon pa stòp ku e guera.
E presidente norteamerikano, Donald Trump, a hasi un yamada riba Ukrania pa aseptá e reunion di djaweps.
E presidente ruso, di su parti, no ke un akuerdo pa stòp e guera ku Ukrania sino un reunion djaweps na Turkia pa negoshá un posibel fin dje dramamentu di sanger. “Ukrania mester aseptá di inmediato”, segun Trump a skirbi riba Truth Social.
E presidente turko, Recep Tayyip Erdogan, ayera a konfirmá e disposishon di su pais pa ta sede dje negosiashonnan.
Eredogan a bisa na e presidente franses, Emmanuel Macron, den un kòmbersashon na telefòn ku “a yega na un punto históriko den e esfuersonan pa pone fin na e guera entre Ukrania i Rusia”, segun e presidente turko.
