KIEV, Ukrania (AFP).- E presidente ukraniano, Volodimir Zelenski, a proponé un reunion ku e dirigente máksimo ruso, Vladimir Putin, den un karta habrí den kua tambe el a ofresé un “paro total di guera” miéntras ku ta negoshá final di esaki. “Ukrania ta proponé pa pone fin na e guera aki mediante un kompromiso dirèkt entre bosnan i nos. Mi ta proponé un reunion”, Zelenski a skibi den un karta ku no ta un kustumber. Kiev ta “dispuesto pa stòp ku e guera miéntras ku e negosiashonnan ta tuma lugá”, el a agregá oranan promé ku Putin a pronunsiá un diskurso den un foro importante di St. Petersburg konosí komo “Davos ruso”.
Putin ta OK pa un reunion: Volodimir Zelenski tin e portanan habrí pa reuní na Mòsku ku Vladimir Putin “na kualke momentu”, segun Kremlin a bisa despues ku e presidente ukraniano a invitá e mandatario ruso na un enkuentro kara-kara pa negoshá fin dje guera.
“Zelenski por bin Mòsku na kualke momento”, segun e bosero di Kremlin, Dmitri Peskv, di akuerdo ku deklarashonnan sitá pa medionan estatal ruso, i a agregá ku Putin ainda no a mira e karta den kua e mandatario ukraniano ta invit’é.
E karta, ku a keda publiká riba e wèpsait di presidensia ukraniano, a marka un dje poko biahanan ku Zelenski a dirigí su mes di forma dirèkt na Putin for di despues dje invashon ruso di 2022.
