Manifestantenan durante un minüt di silensio durante un protesta , despues ku a baha e minister di defensa Fedorov.
KIEV, UKRANIA, AFP.- Manifestantenan a reuní na Ukrania pa un protesta mas kontra remplaso di e minister di Defensa. Na mes momentu presidente Volodymyr Zelenskyy ta enfrentando un di e krísisnan polítiko di mas grandi desde komienso di e invashon di Rusia.
E protesta a kuminsá despues ku a baha e minister popular di defensa, Mykhailo Fedorov, kende a klèsh vários biaha ku e hefe komandante di ehérsito. Ya ta e di sinku dia di manifestashon, un di esnan di mas largu desde komienso di e guera i relashoná direktamente ku e konflikto.
Míles di persona a sali riba kayanan di Kiev desde siman pasá. Nan a karga bòrchinan i karton i kanta e himno nashonal di Ukrania.
Djaluna vários a bolbe konsentrá, aunke e kantidat di manifestantenan tabata ménos pa motibu di e atakenan ruso di fin di siman.
Zelenskyy ta purbando di haña un solushon i evitá mas divishon meimei di e invashon.
Vários reunion a tuma lugá ku su asesornan prinsipal i e kópula militar. Segun medionan i ekspertonan ukraniano, e kòmbersashonnan ta enfoká riba un posibel regreso di Fedorov i futuro di e hefe komandante Oleksandr Syrsky.
E promé protestanan a kuminsá di forma spontáneo djaweps mainta. E protesta ta pa mustra sosten na Fedorov, un minister hóben konosí pa sostené modernisashon di Forsanan Arma. Esaki ta e motibu dikon el a klèsh ku e kópula militar.
