Zr.Ms. Groningen a konfiská 424kg kokaina i hopi plaka kèsh

WILLEMSTAD.- E barku di marina Zr.Ms. Groningen tabatin un siman basta aktivo ku trabounan di patruya den laman Karibe. Nan a logra interseptá diferente go fast durante e tarea komo patruya di Dutch Caribbean Coast Guard. Despues di detektá botonan go fast nan a interseptá 424 kilo di kokaina i tambe un saku ku plaka kèsh. Tur a keda konfiská i entrega na polis di St.Maarten. mas lat a logra reskatá un persona ku kasi a hoga i hib’é tera.
E prome kaso a tuma lugá dia 10 di yüli último. Un spitbot tabata moviendo ku velosidat haltu riba laman ora ku el a keda interseptá pa Zr.Ms. Groningen. Mesora a saka e botonan Frisc ku a logra para e go fast i guia esaki pa e barku di marina un inspekshon. A topa ku 424 kg di kokaina na bordo di e go fast. A pasa e droga e tripulashon pa outoridatnan di St.Maarten.

Dia 12 di yüli tambe Zr. Ms. Groningen a detektá un otro boto ku tabata ,move ku gran velosidat i mesora a saka e helikòpter NH-90 pa opservá loke ta pasando. E tripulashon di e boto aki no a duna oido na señal pa para i esei a pone ku mester a los tirunan dirigí riba e motor pa paralisá e moveshon. E tripulashon a logra benta tur e kontrabanda na laman prome ku e personal di marina a yega. Loke si nan a topa den e área ta un saku grandi ku hopi plaka.
E mesun dia ei e avion di marina Dash-8 a deskubrí un otro spitbot atrobe. Un bia mas a saka e helikòpter NH-90 pa chek loke tabata pasando. Den e kaso aki tambe personal spesialisá a tira dirigí riba e motor di e boto i a logra par’é.
Djadumingu e helikòpter NH-90 a logra skapa bida di un persona ku kasi a hoga. E persona tabata na bordo di un boto di piskadó ku a bòltu. Wardakosta merikano a reskatá e otro miembronan di tripulashon. Mas detaye den edishon di EXTRA.

SHARE

LEAVE A REPLY